Zo hnahthlakte leh Meitei inkap ngun leh

Tun kar chhungin Manipur hmun hrang hrangah Zo hnahthlakte leh Meitei an inkap leh deuh malh malh a, an boruak a lum leh mek.
Chawlhni khan Meitei-in David |hiek an tihlum a, rawng taka sawisak a nih avangin Zo hnahthlakte’n na an ti hle. Hemi hnu hian hmun hrang hrangah an inkap leh tih thu dawn a ni.
Manipur atanga thu dawn danin, chawlhkar hnih chuang an boruak a dai deuh a, chumi hnuah tun kar chhungin silai a puak nasa leh a, hmun khata nasa taka inkah bur bur a awm chiah lo na a, silai chu a puak zing leh.
David |hiek thihna Langza khua leh a chhehvelah hnam pahnihte an inkap deuh char char a, hei hi tun kar chhunga silai puah nasat berna nia ngaih a ni.
Langza khua hi Churachandpur district a ni a, Kangpokpi district lamah pawh tun karah hnam pahnihte an inkap leh.
Kangpokpi district-a Leimakhuong khua leh Saikul khua vel chu silai puah nasatna pawl a ni tih thu dawn a ni a, heng lai vel hi Meitei tana han kal mai theihna a nih avangin, hmun dang boruak a daih deuh lai pawhin a lum hrim hrim a, hmun danga an inkah vak loh lai pawhin Leimakhuong velah hi chuan chawlhkar liam ta tawp lamah khan an inkap tawh tih thu dawn a ni.
Zirtawpni tuk vartianah Kangvai velah nasa takin an inkap bawk a, nunna chan an awm em tih hriat a ni lo.
Kangvai hi Vaiphei khua a ni a, Imphal atanga kala Churachandpur district luhka lam niin, an buai tirh atanga an inep nghalna a ni. Kangvai leh a chhehvelah hian Zo hnahthlakte an ‘duty’ ngawrh a, Meitei-in Churachandpur district luh an tumna tura ngaih a nih avangin chhun zan zawmin an veng a ni.
Manipur atanga thu dawn danin, Ningani khan Imphal-ah Meitei-in Zo hnahthlak hmeichhe pakhat an tihlum a, lainat a hlawh hle.