Duhsak zawngte vohbikna atan CM-in Finance a inpe – R Lalzirliana

Chief minister Lalduhoma chuan a duhsak zawng a vohbikna atan Finance a chang tih minister hlui R Lalzirliana chuan a sawi.
Thawhtannia MNF office Mizo Hnam Runa inkhawmah MNF adviser R Lalzirliana chuan, ZPM sawrkar chu anmahni party bakah anmahni thlangtlingtu neutral pawhin an beisei leh rin ang a ni lo tih a sawi a. Campaign laiin sawrkar hmasa zawng zawng aia chungnung tura insawiin, politics field la dai ngai loten kan ram hruai chhin se, tih duhna a len avangin ram tana mi tling leh tlak tak tak pawh an tla zo rih tih a sawi.
Super chief minister ni tura a inzawrh laiin Lalduhoma chuan ZPM sawrkar chief minister-in portfolio a neih loh tur thu leh an minister chak lo deuhte a dawmkan tur thu a sawi a; a hnua Tv interview-ah CM-in portfolio neih loh a theih loh nia sawiin, department pawimawh tak tak 6 vel a enkawl leh si a. A portfolio chan Finance pawh a duhsak zawngte vohbik theih nan a inpe thlap niin a sawi.
Home minister-in thla khat chhunga dan loa thil phurh zawng zawng tihtawp a tum thu a sawi lai khan, a hmel a en pawhin a ring lo hle tih Home minister hlui R Lalzirliana hian a sawi. “Langsar taka kuhva phurh pawh vawiin thlengin tihtawp a la ni loa, Vairengte leh Bilkhawthlir tlangdunga kuhva chingtute an la buai zel a, kudama kuhva man sa an dah bo ta daih kha khawiah nge a awm tih sawrkar ka zawt a ni,” a ti.
CBI general consent pek chungchangah MNF Legal Board leh MPCC vice president-te thusawi chhanglet ngam loah ZPM a puh bawk.