Duhthu sam lo mahse oil phurhluh tan tum

Oil an phurhluhna kawngpui a chhiat avanga tlan rih lo, oil tanker-te chuan kawng thawmthat chu duhthusam la ni lo mah se, mipui mamawhna avangin an tlan tan leh tawh dawn tih an sawi.
Mizoram Oil Tanker Drivers’ Association (MOTDA) leh Petroleum Entrepreneurs’ and Transporters’ Union of Mizoram (PETUM) chuan Zirtawpni khan National Highway 306, Kawnpui leh Sairang inkar kawngpui thawmthat mek chu an enfiah tih an sawi a. An pawl thuchhuak chuan, kawng khuar zualpui lai hnawh ni mah se, tuialhtheiphur lirthei (oil tanker) tlan nan chuan duhthu a la sam lo hle, tiin, ‘Kawng siam mek hian duhthu sam lo hle mah se, tuialhtheiah Mizoramin harsatna a tawh nasat tawh em avang leh mipui mamawh a rang thei ang bera phuhruk a ngaih tawh avangin tlan thei leh a tlan ngamte chu tlan tawh mai nise, kan ti a. Kawngpui siam meka hmachhawp la awm pawh tha tak leh rang taka thawh chhunzawm a nih theih nan sawrkarin hma a lak zel kan beisei,’ a ti.