ECI buatsaih Media Conference-ah Mizoram atangin journalist 7 an tel
Election Commission of India buatsaih All India Media Conference 2026 chu Zirtawpni khan New Delhi-ah neih a ni a, inthlan kaihhnawih hrang hrang zirho a ni. Mizoram atangin thuthar thehdarhtu mi 7 leh Chief Electoral Officer Office Mizoram atangin joint CEO Ethel Rothangpuii leh SIR Media in-charge Lalnunmawii te an tel.
Conference-ah hian ECI mithiamten thupui hrang hrang an zirtir a. Director general (Media) Ashish Goyal chuan inthlan buatsaihna hrang hranga media mite nen an thawhho dan sawiin, mipuiin thudik leh rintlak an hriat theihnan thuthar thehdarhtu pawimawhna a sawizau a. thudik tawklo awm theiah media leh ECI chu thawkho tur an ni tih sawiin, India chu khawvela democracy ram lian ber a nih angin inthlan buatsaih a hautak a, hei vang hian thawhhona tha tak an mamawh tih a sawi a ni.
DG (IT) Dr Seema Khanna pawhin, tunlai thiamna hmanga inthlan kaihhnawih thuthar hrang hrang awlsam taka mipuiin an hriat theihnana hma an lak dan a sawi a. ECINET hmangin state tina vote thlak dan kimchang hriat theih chu hmang tangkai turin media-te a chah.
India rama state leh UT tin atangin media mite leh state media nodal officer an tel a. Democracy-a journalist-te mawhphurhna pawimawh zia thlur bingin, inthlan kaihhnawiha mipui hriat tur thu dik zau zawka an puanzar a, thudik lo (disinformation & misinformation) thehdarh do let kawngah chak lehzuala thawhho theihna atan inkhawmpui hi buatsaih niin, thupuiah “Connecting Stakeholders, Strengthening Democracy: The Role of Media in Elections” tih hman a ni. Thupui zirho zingah ECINET platform leh inthlana IT pawimawhna, inthlana media pawimawhna, dan kaihhhnawih leh court judgment chungchang a tel a ni.
Media Conference 2026 ah hian rampuma journalist hrang hrang kalkhawmin, tunhnaia ECI hmalakna – Special Intensive Revision bakah inthlan kaihhnawih pawimawh mipui hriata puanzar tur an sawiho a. ECI hmalakna leh hmachhawp hrang hrang mipuiin awlsam zawka an hriat theihnan training buatsaih a ni.
Mizoram atangin HC Vanlalruata correspondent Times of India; K Zothanpara, joint editor Vanglaini; Lalramdinsanga, asst news editor LPS News; B Lalmalsawma, correspondent India Today NE; Caroline Lalrosangi, news reporter DDK Aizawl leh Zorinpuii Hlondo, programme presenter Zonet an tel.