Khawthlang kawng siamtha rang turin MLA-in PWD minister ngen

Mizoram khawthlang lam kawngpui che a chhe hle a, siamtha rang turin PWD minister a ngen tih Hachhek bialtu MLA Robert Romawia Royte chuan a sawi.
Hachhek bialtu MLA hian July 17 khan PWD minister Vanlalhlana hnenah ziakin a thlen a. PWD minister leh department hotute hnena a sawi fo tawh angin, khawthlang kawngpui hi emegency-a hma la turin khawthlang mipui aiawhin a ngen a, a phut bawk tih a sawi.
Bairabi to Zamuang Road-a hnathawh chu a chhiain a muang em em a, hnathawh zawh hun tawh turah pawh 10% thawh a la ni lo nia sawiin, he kawng hi ZPM general secretary-in a thawh a ni a, ngampa takin hma la turin a ngen tih a sawi a ni.
Darlak leh Tuidam inkar short cut kawng a chhiain a hlauhawm hle tih MLA hian a sawi a. He kawng siamthatnan project atang hian One Time Improvement (MoRTH) sum sanction a ni tih PWD minister hian 2025 July 18 khan a puang tawh tih sawiin, ‘Chuti chunga heti tak maia he kawng a la hlauhawm a, a la chhia hi chu khawthlang mipui hmuhsitna a ni hial em tih theih a ni,’ a ti.
He short cut kawng leh main road thar leh Bairabi to Zamuang Road atan hian contractor awm tawh, sum pawh awmsa vek nia a hriat thu a sawi. “Siamtha thuai turin ka ngen che a. Kawngpui siamthatnana mipui sum thawhkhawm (cess for road infrastructure) pawh hman mai ka rawt a ni,” a ti.
Kanhmun to Damcherra lei pawh kumin May 22 khan PWD minister-in a hawng a. Kumin July 17-ah pawh a taka lirthei zawh theih a la ni lo chu ‘kalphung thalo’ tak a ni tih Robert Romawia Royte hian a sawi a. A rang lama lirthei kal theiha siam turin a ngen tih a sawi a ni.