Eco & Stats building sak dan chhui sak turin ZPM Thalai-in ACB ngen
Economics & Statistics Directorate building MINECO ami sak a nih danah corruption a awm ngei nia an hriat avangin ZPM Thalai chuan Anti Corruption Bureau-ah corruption complaint /FIR an thehlut.
ZPM Thalai Hqrs. Vigillance department general secretary Boris Zoremsiama hminga ACB-a complaint thehluh a ni a. Hemi chungchang an sawi danin, Economics & Statistics building hi kum 2014 a Congress sawrkar laia Pu Robert Romawia Royte firm NECS sak a ni a, kum 2021-a MNF sawrkar lai khan a building hnuailam hi sak chhunzawm leh tura rawtna a awm avangin, 2022 May 19 khan PWD Quality Control, Research and Development Sub Division-1 chuan a enfiah a, a building structure hi a nih dan tur – M20 grade aia hniam, M10 grade aia hniam vek a nih avangin sak chhunzawm chi ah an ngai loa, hetihlai hian he building satu MLA Pu Robert Romawia Royte hi MNF sawrkarah minister ni lo se chu MNF sawrkar khan corruption case an siamsak hial an ring tih an sawi.
PWD Quality Control lamin an thil hmuhchhuah hi 2022 June 6 khan, khatih laia PWD engineer in chief Bowman khan Economics & Statistic director leh Disaster Management & Rehabilitation director hnenah hriattirin, 2023 March 27 khan Aizawl DC pawhin joint inspection nei turin notice a chhuah a; 2023 April 6 khan joint inspection hi neih niin, he building hi a him lo hle a ni tih an report-ah tarlan a ni tih an sawi.
Kum 2023, MNF sawrkar lai vekin, accountant general-in audit a kalpuinaah he building chungchangah hian Mizoram Procurement Rules bawhchhiatna engemawzat a hmu chhuak
tih pawh ZPM Thalai hian sawiin, he building sak a nih laia Congress sawrkar leh NECS-in hna an inpek danah Rules an bawhchhia tih a chiang a, AG hian he building sak hna hi a nih tur ang tling phalo, tiin, NECS hi insawifiah turin a ti a, a insawifiah loh chuan audit pawh kaltlangpui a tum lo tih tarlan a ni tih a sawi bawk.
‘He building sak chungchang hi kan ngaimawhin thil felhlel awm nia lang hi kan ngai thutak hle a. Mizoram State Project Monitoring Committee-in inspection an nei dawn tih kan hriatin kan lo ngaichang reng a. 2026 June 9 khan MSPMC hian inspection neiin, he building satu NECS hian dan tam tak a bawhchhe ngei niin a report a; action la turin sawrkar pawh a ngen hial a ni,’ an thuchhuah hian a ti.
Economics & Statistics building chungchangah hian PWD, Aizawl DC, AG leh Mizoram State Project Monitoring Committee ten thil fello, diklo leh himlo an lo hmuhchhuah chu ZPM Thalai Hqrs chuan a umzui zel a, hnam rotling tur suasama a ni chu ngawihbo pui chi ah an ngai lo tih sawiin, ACB-in he case hi chhuiin, corruption awm ang leh a mawhphurtute hremna pe ngei se an duh tih a sawi a ni.