Eddie Van Halen guitar $2M a hralh theih an beisei

Eddie Van Halen guitar $2M a hralh theih an beisei
Cancer vanga rei tak a inenkawl hnua October 2020 a chatuan ram pan ta, rocker Eddie Van Halen guitar, rimawi khawvela guitar lar ber pawla an sawi tel thin 1982 Kramer chu an lilam dawn a, dollar maktaduai 2 chuanga hralh theih an inbeisei.
New York-a lilam lam timi Sotheby’s October ni 21-28 chhunga ‘Grails Week’ an hman turah thil chi hrang hrang an lilam dawn a, chung zingah chuan he guitar pawh hi a tel. He electric guitar hi Van Halen tour, 1982 leh 1983 chhungin Eddie Van Halen hian a hmang thin a, black & white-stripe design niin, 1975-a Van Halen guitar hriathlawh tak ‘Frankenstart’ zul deuha design a ni.
Sotheby’s-in an tarlan danin Van Halen hian New Jersey-a Kramer factiry hi tlawhin, guitar a tidanglam (modify) a, amah ngeiin a siam lai vel thlalak te pawh hmuh tur a awm. A hnuah he guitar hi Kramer advertisement hriathlawh taka langin, Van Halen hian “tunlaia lei theihah chuan guitar tha ber a ni ringawt,” tiin he guitar hi a lek chhuak a ni.
A hnuah he guitar hi Van Halen hian guitar technician Robin ‘Rudy’ Leiran hnenah a pe a, “Rude- Kum sawm chhung nuam tak a ni – Kum sawm dang hmang leh ang aw. Eddie Van Halen” tih a ziak kalh bawk. Leiran hian a hnuah he guitar hi Mick Mars (Motley Crue) hnenah a hralh leh a, Mick Mars hian an No.1 album hmasa ber 1989-a an tlangzarh ‘Dr. Feelgood’ recording-ah he guitar ngei hi a hmang zui ta a ni.
Sotheby’s-in an lilam turah pawh hian Mars hian a lem mai mai a ni lo tih hriatpuina a hming ziak hnan ngei an dah tel thlap a, “Ka hlimpui ang bawkin in hlimpui ve ka beisei. History ropui tak a ni bawk e,” tiin a ziak.
Sotheby’s chuan he guitar hi dollar maktaduai 2 chuangin an hralh theih ngei an inbeisei a, 2020 khan Van Halen guitar dang an lilam pawh dollar 4,22,000-in an hralh a, 2023 khan “Hot For Teacher” video-a a hman guitar pawh dollar maktaduai 3.93-in an hralh tawh bawk.