Education-ah cheng khat hlawhin AAP-in sawrkar enkawlpui inhuam

Education-ah cheng khat hlawhin
AAP-in sawrkar enkawlpui inhuam
Mizoram sawrkarin education a kalpui mek dan chu a ngaihna hre hlawl lo nia an hmuh avangin cheng khat hlawha enkawlpui an inhuam tih AAP Mizoram chuan an sawi.
AAP Mizoram hruaitute chuan School Education department thuchhuakah Aizawl district school tam takah zirtirtu indaih lohna avangin subject thenkhat zirtirna pek loh leh exam conduct loh a awm tih hmu theih a ni, tiin, he thuchhuah vekah hian zirtirtu indaih lohna avanga subject thenkhata zirtirna dawn theih lohna chu, school head master/ mistress ten a tul anga hma la in. ruahmanna siam tura ngen an ni tih a sawi.
‘He thuchhuah hi mak kan ti hle a. Mizorama sawrkar sum indaih lohna kan hriatthiampui rualin, kan ngaihpawimawh hmasak ber zirna-in a tuar mek lai a, ngaihpawimawh hmasak nilo, party worker-te contract inpek, sawrkarin a mamawh hauh loh nia adviser leh an office enkawlna tura sum tam tak luangral mek leh zirtirtu indaih loh laia party hruaitu education consultant atana rawih avanga sawi an kai ta mai hi pawi kan ti hle,’ a ti.
School infrastructure siam chu kan mamawh rualin, a pawimawh hmasa zirtirtu, zirlaite mamawh pek chu sawrkar tha tih turah an ngai tih AAP Mizoram hian sawiin, ‘Tuna office thuchhuak kan hmuh hi chu, hmangaihna tel lo induhsakna ang a ni. Sawrkar school tin hian sum dawn belh tur engmah an neih loh lai a, sawrkar pawhin a tih theih loh tih tir a tum hi mak kan ti hle,’ a ti.
Inthlan hmaa ZPM manifesto chapter VI, Education(c) na – zirtirtu leh zirna in semrual (rationalisation of teacher and institution) kalpui a ni ang, tih chu engtikah nge kalpui a nih dawn tih zawtin, tun hi mamawh lai tak a ni tih a sawi.