Edwards a chak nawn leh

Edwards a chak nawn leh
Pathianni zing khan London khawpuia O2 Arena-ah hlawhtling takin UFC 286 neih a ni a. Hmuhsit vanga auhel a lo hlawh tawhna hmunah ngei Leon Edwards chuan a elpui lian Kamaru Usman hneh nawn lehin a kawnghren a humhim. UFC 286 a fight dangah Justin Gaethje a chak ve bawk.
UFC 286-ah Welterweight champion lai Leon Aron Edwards leh champion hlui Kamaru Usman te intum nawn leh tur hian ngaihven a hlawh hle. Anni pahnih hi vawi hnih an lo intum tawh a, vawikhat ve ve chak zawkah an tang tawh. Kum 2015 khan Eswards hi Usman hneh lovin a tlawm a. Kum 2022 khan UFC 278-ah a vawi hnih nan inhmachhawnin, kawng-hren an inchuh. Title fight hmuhnawn takah hian Ed-wards hian round nganaah a khingpui a knock-out a, Usman kawnghren a chhuh-sak. UFC 286-ah an intum nawn leh tur hi a vawi thum intumna tur niin, an inkarah chak zawk tihchianna tur a nih nghal vangin ngaihven a hlawh leh zual.
Champion lai Edwards hian a elpui lian Usman lakah bul a tan tha a, a khingpui hi a pet fuh fo a, a hnek fuh zauh zauh bawk. Champion hlui Usman hian a khingpui hi keuh thluin, pawh ber zauh zauh mah se, hnehna chang tur khawpin a chungnung thei bik lo. Round lina tawp thlengin chak zawk tur rin thiam har khawpin an inhnehtawk a. Round hnuhnung bera chetha zawk Ewards chu majority decision hmangin a chak a, a vawi hnih nan Kamaru Usman a hneh a, a kawng-hren a humhim zui ta a ni.
UFC 286 a fight ngaih-ven hlawh berah hian endiktu pahnihte chuan point 48-46 in Edwards an chaktir a, endiktu pakhat chuan point 47 ve ve pe in, a inhneh-tawktir ve thung. Kum 2019 khan Leon Edwards hian O2 Arena-ah ngei hian auh nawmnah a lo hlawh tawh. Hemi tum hian a khingpui Gunnar Nelson chu split decision in a hneh. Fighter lar zawk a hneh tum hian tualchhung mi a ni zawk chungin lawm a hlawh lo viau a, O2 Arena-a mipui pungkhawm ten hmusit takin an auzel. 2019-ah hmuhsitna nasa tak tuar mah se 2023-ah chuan thil a inthlak danglam chiang ta viau thung a. Fighter lar Kamaru Usman hnehna a kawnghren kawl lai a humhim vangin lawm a hlawh hle a, an auh elna hmunah ngei chawimawina au thawm chauh lo chu thawm dang reng reng hriat tur a awm tawh lo.
Kamaru Usman hneh nawn lehtu Leon Edwards hian a Briton pui Michael Bisping hnung zuiin a vawikhat nan title a humhim a. Title fight a hmachhawn leh hunah a chak a nih chuan Bisbing record khumin, Brition zingah UFC title humhim ngun ber thar a ni ang.
UFC 286-a fight ngaihven hlawh dangah Justin Gaethje chuan a khingpui Rafael Fiziev lakah majority decision-in hnehna a chang ve bawk a. Title fight hma-chhawn leh thei turin Gaethje hian hma lam a pan.