Egypt harsa, ar ke ei turin infuih

“Aw Lalpa, ar ke ei ngai ngei ngei khawpa harsain min siam suh” tiin Giza market a ar sa zuar chuan a sawi a.
Egypt chuan economic crisis turu tak hmachhawn mekin, harsatna namen lo chuan chhungkaw tam tak chu ei leh bar tlachhamin a siam mek a ni.
Sorkarin nutritional advice thar ber a pekchhuahah mipuite chu arsa ah pawh protein tamna lai mahse ui leh zawhte ei tura ngaih mai thin ar ke ei tam turin a ti a.
Sorkar thurawn siamthain thinrimna siamin sorkar sawiselna nasa tak a hring chhuak nghal bawk a. Ram tam takin inflation sang tak an tawng mek a, mahse, March thlaa 30% chunglam tawng mek Egypt chu inflation san turu zualna ber a ni.
Mi tamtak tan chuan ni tin mamawh cooking oil leh cheese te ang chu lei phakloh luxury a ni der tawh a. Thla khat chhungin thil man a let hnih thum velin a pung tawh a ni.
“Thla khatah sa tum khat ka ei a, kan lei miah loh pawh a awm a. Karkhatah arsa tum khatte kan lei” tiin Wedad, kum sawm ruk vel aupa fa pathum nei chuan a sawi a, “Tunah chuan artui pakhat pawh LE5 (US $0.16) lai a ni” tiin a sawi.
Egypt-in harsatna namenlo a tawhna chhan ber pakhat chu ram dang atanga ei leh bar chawluta a innghah bur vang niin mipui maktaduai 100 chuang chawm turin ram dang thlai tharchhuahah a innghat deuh bur a ni.
Egypt-a ar vulh te pek tur a chaw pawh ram dang atanga chawk luh tho a ni a. Thla 12 chhungin Egyptian pound chuan US dollar lakah a hlutna a zahve a hloh tawh a. January thla khan sorkar chuan pawisa hlutna chu tihniam luiin hei hian ram dang atanga ei leh bar lakluhna man chu a tisang zual zui bawk.
“Tunah chuan chicken fillet kilo khat chu LE160 man a nia, hmun thenkhatah chuan 175, 190 te 200 nihna te pawh a awm” tiin Wedad chuan a sawi.
Egypt in economy lama harsatna a tawhna chhan chu President Adbdul Fattah al-Sisi chuan kum 2011 Egyptian uprising leh mipuin pungchak lutuk bakah pandemic leng leh Ukraine indona chu a puh deuh ber a.
Nikum atanga Russia in Ukraine a run chuan Egupt economy a nghawngna hle a. Egypt hi khawvela wheat chawluttu lian ber dawttu niin Russia leh Ukraine chu a chawkluhna lian ber pahnih an nih vang a ni. Indona in wheat thawnchhuah a nghawng avangin lohtheihlohin chhang leh a kaihhnawih man te chu Egypt ah a sang nghal a ni.
Hei bakah hian Russian leh ukrainian holidaymaker te chuan Egypt hi tlaw bera an neih niin indona vangin tourist sector te chuan an tuar zui ta bawk a. A hma chuan Egypt tourism hian pandemic len hma in gross domestic product (GDP) 5% lawih a thawh thin a ni.
Analysts te chuan Egypt in harsatna a tawhna chhan chu sorkar hmalakna dik loh vang an ti bawk a. President thuneihna sang zual zelin military, security leh intelligence agency te an lian in thil an tithei rual tual thung, tiin Timothy Kaldas, political economist, Tahrir Institute for Middle East Policy chuan a sawi.
Kaldsas chuan hei hi a thlen theihna chhan chu sorkar enterprise te tihlen zel a nih vang tia sawiin entirnan military te chuan infrastructure priject lian ber ber an thawk tiin a sawi bawk.
Chutih laiin private sector te inhnamhnawihna a tlem tial tial thung a, sorkar a inziaklut lem lo leh inzawmna nei lo te chu an tlahniam tial tial a, foreign investor tam tak ten Egypt an chhuahsan phah tawh a ti bawk.
Sum lama harsatna namenlo a tawh avngin International Monetary Fund (IMF) bailout tun hnai kum ruk chhungin tum li a tawng tawh a. State revenue zahve chu leiba rulh nana hman niin chu chu GDP atanga 90% lawih a ni.
Gulf ram United Arab Emirates leh Saudi Arabia te ang chuan chung state asset te chu leiin Egypt puih nana an tih a ni a, chutihrual chuan investment tihbelh zel turin thudehkilh khirh tak tak an dah thung.
Egypt economy buai hian lungawilohna nasa zawk a hrinchhuah leh hlauhna a lian hle bawk.