Egyptian ten Cleopatra ‘black’ tir tum duh lo

Netflix docudrama series a Queen Cleopatra VII chu black African anga lantir chuan Egypt-ah lungawilohna leh inhnialna nasa tak a siam.
Lawyer-te chuan African Queens: Queen Cleopatra tih chu media law bawhchhiaah leh ‘Egyptian identity nuaibo tum’ tiin an hek a ni.
Archaeologist te chuan Cleopatra kha ‘mihang ni lovin, vun ngo lam a ni’ an ti thung a.
Mahse documentary siamtute chuan ‘Cleopatra heritage chu inhnialna nasa tak siamtu a ni’ tia sawiin Cleopatra lema chang actress chuan “A changtute in duh lo a nih chuan a en lo mai rawh u” a ti thung.
Cleopatra kha Egyptian city Alexandra-ah 69 BC khan piangin dynasty Alexander the Great-a dina a Macedonian general Ptolemy a lal rama queen hnuhnung ber a ni a.
A pa Ptolemy XII chu 51 BC khan a aiawha rorelin a thih thleng 30 BC thlengin ro a rel a, a hnuah Egypt chu Roman rorelna hnuaiah a tlulut leh thung a ni.
Cleopatra nu hriat chian theih a ni lo va, historian te chuan a nu chu indigenous Egyptian emaw Africa khawi hmun dang ami emaw a ni ang an ti.
Netflix te chuan Cleopatra-ah hian British actress thlah pawlh Adele James chu an chantir a. He docudrama producer Jada Pinkett Smith chuan, “Black queen chungchang kan ngaithla emaw kan hmu ngai meuh lo, chutak chu ka tan chuan a pawimawh em em a, ka fanu tan pawh a pawimawh a, kan community tan pawh heng thawnthu te hi an hriat atan a pawimawh a ni,” tiin a sawi.
Kar kalta khan a tariler tihchhuah a nih hnuah Egyptian tam tak te chuan an duh loh thu an sawi nghal thung a.
Zahi Hawass, prominent Egyptologist leh antiquities minister hlui chuan al-Masry al-Youm newspaper hnenah, “Hei hi dawt phuahchawp a ni a. Cleopatra kha Greek a ni a, vun hang ni lovin vun ngo lam a ni,” tiin a sawi.
Hawass chuan Egypt rorel tawh tute zinga mihang awm chhun te chu Kushite king te 25th Dynasty (747-656 BC) te chauh an nih thu a sawi bawk a.
“Netflix te hian dawt thu thehdarha mi hum tumin Egyptian civilisation chu black a ni tih an tum a ni” tiin a sawi a, Egyptian te chu he thil hi chhuah remti lo turin a ngen bawk.
Lawyer Mahmoud al-Semary pawhin public prosecutor hnenah dan anga hma laa Neflix service chu Egypt ah titawp turin a ngen bawk a. Egyptian media law an bawhchhia tia sawiin Netflix te chuan ‘Afrocentric thinking tih alh tumin Egyptian identity dik tak nuaibo an tum a ni’ tiin a sawi bawk.
Kum thum kalta khan Cleopatra movie siam tumnaah pawh sawi hlawh hat thleng tawhin Israeli actress Gal Gadot chu chantir tum a ni a, hei hi mi tam takin duh lovin Arab emaw African actress chantir zawk ni se an lo ti tawh bawk a.
Gadot pawhin, “Macedonian actress Cleopatra anga chang thei awm kan zawng zawk a, kan hmu lo va, Cleopatra hi ngaihnawm ka ti,” tiin a sawi nghe nghe.