Mihring tam lamah India-in China khum ang

Kumin kum laihawl vel hian India chuan China khumin khawvela mihring tamna ber a ni ang tiin United Nations data tihchhuah chuan a tarlang.
India population chuan 1.4286 billion a hawlh dawna ngaih niin chu chu a thenawm China 1.4257 billion aiin 2.9 million in mipui a ngah zawk dawn a ni.
Asian ram lian pahnih te hian khawvel population hmun thuma thena hmun hnih lai chu kum 70 chhung an hauh tawh a.
China population chu tun hnaiah tlahniam chho char charin nikum phei kha chuan kum 1961 hnua thi aia naupiang an tlem zawk tum khatna an tawng bawk.
United Nations Population Fund (UNFPA) State of World Population report-ah India-in kum 2011 hnuah census a la neih leh loh vangin estimate dah a ni lo va.
Kum 10 danah chhiarpui nei ziah kha kum 140 chhunga a tum khat nan kum 2021 chhiarpui tur kha Covid avanga thulh niin kum 2022 ah neih tura tih a ni a, chu chu tikhawtlai lehin kum 2024-ah neih tura tih a ni leh ta a ni.
UN’s Chief of Population Estimates and Projection, Patrick Gerland chuan India population dik tak kan hre thei lova ngaihruatna mai bak neih kan nei rih lo. “India atangin data dik tak kan la nei thei lo,” tiin a sawi a.
UN-in estimate a siamah China in Special Administrative Region pahnih a neih Hong Kong leh Macau an chhiar tel loh thu sawiin hengah te hian mipui maktaduai 8 chuang an awm a, Taiwan pawh chhiar tel a ni lo a ti bawk a. Taiwan hi China in a ram inla hrang anga a ngaih niin Taiwan erawhin mahni inrelbawl ramah a inngai thung.
Nikum November thla khan khawvel population chuan 8 billion a kai a, mahse mithiam te chuan tun hma angin population chu a tam thur thur tawh lo tia sawiin kum 1950 hnua population pung chak lo ber an ti zawk.
China leh India-ah hian fertility rate a tlahniam ve ve a, a awmzia chu nakum atangin China population chuan hniam lam a pan tak tak dawn a, kum 2016-a one-child policy a hnawl tawh chungin leh nupate chu fa pahnih aia tam nei tura a ngen chungin naupiang an tlem tial tial thung.
China-a population tlakhniam chhan pakhat chu living cost sang lutuk leh hmeichhia tam tak tena hna an thawh tawh vang tia sawi a ni a. India ramah pawh fertility rate tlahniam zelin kum 1950 vela hmeichhia pakhatin fa 5.7 vel nei kha tunah chuan 2.2 vel chauh nei an ni tawh bawk.