Eithad club-a goal venhim hna thawk tur Josko

Eithad club-a goal venhim hna thawk tur Josko
Manchester City chuan euro maktaduai 90 (£77m)-a defender Josko Gvardiol lei turin RB Leipzig an hmin.
Season liamta Champions League match pakhata 7-0 tehrenga mualneitu team-in Leipzig an sawp tum khan Croatia defender Josko hian Etihad Stadium-ah Erling Haaland a um nasa mai a, season tharah chuan an tangdun tawh dawn.
Kum 21 mi manah hian pekbelh tur dang bilh tel a nih loh avangin kum 2019-a Harry Maguire man atana Manchester United-in Leicester City hnena pound maktaduai 80 an leina man kha defender mana British record a la ni chhunzawm zel dawn a ni.
Josko Gvardiol hian kum 2021-a Dynamo Zagreb chhuahsana Bundesliga club a zawm hnu khan German club tan game 87 khel tlingin, Leipzig player pawimawh a ni.
An ruahman dan chuan tunkar tawp hian medical paltlang turin England a thlawklut ang.
Karliamta mai khan Leipzig hian an defender chhuanvawr man atan euro maktaduai 100 (£86m) aia tlem chu an pawm loh tur thu an sawi a, kha vang khan City hi a pan theih loh mai rinna a lian hman a, mahse, manager Pep Guardiola chuan Gvardiol hi an central defence veilam tha tichak tura a awh tlat avangin English club-in an dawr chhunzawm a, Ruben Dias, Manuel Akanji leh Nathan Ake-te nena tlarhnung luahho turin an sitlu thei ta hram a ni.
Left-back lama tan khawh thei tel Gvardiol hi tun nipui insuan hun laia City player lian lei pahnihna niin, June thla khan Croatian player bawk Mateo Kovacic chu Chelsea atangin an senglut tawh a, sum hma-hruaiah pound maktaduai 25 an seng phawt.
Season liamtaa an captain Ilkay Gundogan khan free transfer-a Barce-lona a zawm tak avangin Kovacic hian City midfield-ah Gundogan hmunruak a luah dawn a; hetih lai hian City winger Riyad Mahrez pawhin karliamta mai khan Saudi Arabia club Al-Ahli a pan a, a manah Premier League champion hian pound maktaduai 30 an rut.
Ram tan pawh Gvar-diol hian a thawhhlawk a, Croatia tana game 21 a khelh tawhah defende atanga goal hnih khung tling tawhin, 2022 World Cup-ah a ram chu pathumna a nihpui a, kumin Nations League final-ah Spain ngam loin runners-up a nihpui leh bawk.
Bundesliga a pan hmain Josko Gvardiol hian an ram club lian Zagreb chu title lakzawn-puiin, league leh cup double champion a nipui a, Germany ramah pawh player langsar ni zui zelin, Leipzig chu tum hnih Champions League khel turin a tlinpui a; Bundesliga bikah palina leh pathumna a nihpui.