Eizawnna kalpui tawh puih tulte tan CM Special Package tih tum

Eizawnna kalpui tawh sa, tlem azawnga puiha hma sawn dawrh thei ho puihna tur, CM Special Package siam a ni dawn tih chief minister Lalduhoma chuan a sawi.
Mizoram State Policy Coordination Committee leh implementing department hotute chuan Hand Holding Policy kalpui dan tur (guidelines) thlirin chief minister Lalduhoma hoin Thawhtanni khan an thukhawm a. Hand Holding Scheme hi tlangzarh an chak tawh a, tih tur tul la awm apiang chinfel thuai thuai an duh tawh hle tih chief minister hian a sawi.
“Sawi fo tawh angin, he scheme hi bank nen tanghoa kalpui tur, central scheme awmsa thenkhat nen kalkawp tur a ni a. Progress partner tan rulh leh ngai hmalakna deuh zel a ni. Amaherawh chu dahkham ngai lo, a tithate tana interest awm lo a ni thung,” a ti.
PMEGP chu margin money duh vang maiin miin an dil thin a, hmalak tumna tak tak a awm thin lo, tiin, Hand Holding Scheme ah chuan hetiang chi hi a awm an remti loa, a thlawna sem an tum loa, a dawngtu tur (progress partner) duhsak bik nei loin a hlawhtling ngei tur chauh thlan tum a ni tih a sawi. Partner thlan leh enkawl zui chu implementing department mawhphurhna a ni tih a sawi bawk.
“Loan deuh veka kalpui tur a ni chungin, tha taka eizawnna kalpui mek tawh sa, tlem azawnga han puiha hma sawn dawrh thei ho puihna tur bik, CM Special Package siam a ni dawn a, tanpuina sum erawh a tam thei dawn lo,” Lalduhoma hian a ti. He special package dawng tur hi implementing department ho bawkin an thlang anga, an vil zui bawk dawn tih a sawi. Kumin bik hi pilot project angin an kal phawt anga, a tul ang zelin an tilian chho dawn tih a sawi.
Planning secretary, MSPCC member secretary Lalmalsawma Pachuau chuan hand holding kalpui dan tur (guidelines) duan tawh a sawifiah a. ZIDCO managing director LP Lalchangkima’n interest free loan kalpui dan tur leh guarantor-a sawrkar a tan dan tur ruahmanna a sawifiah ve bawk. Member-ten hriatchian duh an neihte an zawtfiah a ni.
Thutkhawmah hian Land Resources, Soil & Water Conservation minister Lalthansanga, Agriculture minister PC Vanlalruata, Tourism minister Lalrinpuii, Horticulture minister Prof. Lalnilawma, LESDE minister Lalnghinglova Hmar, adviser to CM (Hand Holding) Dr KC Malsawmzauva bakah Coordination Committee member leh line department official-te an tel a ni.