Electric man avanga vanduainathleng thin kan bawhzui dawn
- P&E minister
Electric man avanga vanduaina
thleng thin kan bawhzui dawn
- P&E minister
Tunhnaiah electric current man vanga vanduaina thleng palh a awm zauh zauh a, a thlen tawh lohna turin department lamin a tih theih chin chu an bawhzui dawn tih Power & Electricity minister F Rodingliana chuan a sawi.
Thuthar thehdarhtuten an zawhnaah P&E minister chuan tunhnaiah Mizoram chhim lam power pek leh hman dan an zirchiang a, siamthat ngai a tam rualin, mipui lam pawh hriatlohna avanga inthlahdah leh palzam a tam tih an hmuh thu a sawi. Kum 30 kaltaa electric hrui kalna atana ban an phun, tunhnua a bulhnaia in sak avanga electric hrui leh ban nena inhnaih taka awm ta, electric ban awn tur venna thir tlawn lak bo, electric hrui lo tlafual ta thlengin a awm tih a sawi
“Tunhnaiah electrical accident avanga nunna chan leh hliam tuar hriat tur a awm nual a, department pawhin hrehawm kan ti hle. Zangnadawmna an dawn theih angte pek nghal mai kan duh laiin, kalphung zawm tur awm tih hmasak a ngai a. Kan phak tawk a tam lo a nih pawhin kawng engemaw tala puih kan tum a ni,” a ti.
Electric ban an phunna leh a hrui kalna chu an phun lai, kum 30 chuang liamta chuan a hnawk loh laiin, tunah chuan a bulhnaia in sak avanga chenna in leh vantlang tana hnawk leh hlauhawm ni thei ta a awm nual a; department tan sawnkual zung zung turin sum an neih bawk si loh avangin mipui/ khawtlang pawhin in sak leh hmasawnna hna thawhna kawngah hriatpui tel thin se, a tul angin department hriattir thin se an duh hle tih P&E minister hian a sawi a ni.
P&E department hotuten zawhna an chhan danin, tunah hian an department-a sanction post chu 2155 a ni a, hetah hian post 845 chu hnawhkhah loh a ni. A nih dan tur ang takin kal dawn ta nise, engineeer, office-a thawktu leh thir bana lawn tur thlengin, tuna thawktu awmsa bakah thawktu an mamawh belh zat chu 3900 a ni.
Zirtawpni vek khan P&E minister ho hian department hotute an thukhawm a. Electrical accident thlengah sawrkar dan anga nunna chan leh hliam tuar, sawrkarin chhawmdawlna (ex-gratia) a pek theih ang chu rang taka pek tura hma lak a rel. Bungtlang South-a accident thlennna hmun chu ramria duty BSF ho line a ni a, BSF pawh line siamtha tura hriattir niin, hun tiam chhunga an siamtha lo a nih chuan power supply pek loh mai nise tiin an rel a ni.