Ella Langley “Choosin’ Texas”-in Mariah Carey ‘Christmas’ lehpelin record a siam

On Sep 24, 2026 0 0

Ella Langley “Choosin’ Texas”-in Mariah Carey ‘Christmas’ lehpelin record a siam
Ella Langley hla hit “Choosin’ Texas” chu Billboard Hot 100 (US singles) chart-ah a No.1 a, he chart-ah hian a zawn lovin kar 23 a No.1 tling ta a, he chart-a No.1 ni rei thei ber a ni ta a ni.
Ella Langley “Choosin’ Texas” hian kar kalta khan he chart-a No.1 ni rei ber record siamtu Mariah Carey Krismas lengzem hla “What I Want for Christmas Is You”, kar 22 No.1 record a rawn nih ruala, tunkarah a No.1 leh tak avangin Carey ‘Christmas’ hi lehpelin, chart No.1 ni rei ber record a siam ta a ni. Carey hla hi 1994-a a tlangzarh tawh kha niin, 2019 atangin Krismas vuakvet-ah kumtin a rawn No.1 ta ziah a, 2026 January thla thlengin kar 22 a No.1 thei a, Ella Langley “Choosin’ Texas” kar 23 No.1 hi chu kumin February khan a vawi khat a No.1 a, kum khat tling loah kar 23 a No.1 thei ta a ni.
‘Choosin’ Texas’ hla hi Langley, Luke Dick, Mirana Lambert leh Joybeth Taylor te phuahho a ni a, heti khawpa a rawn lar ta hi chu a beisei phak bak a nih thu Langley ian a lo sawi tawh a, “Ka hrethiam tawh bik lo. A phuahtute pawh hian kan sawiho a. He hla hi kan ngaina. Thup awm lem lo a tlang taka kan thlir dan puan chhuahna a nih vang nge pawh ka hre bik lo…hla dang tam tak hetiang chi hi a ka hre nual tho bawk si a, chuvangin a chhan hi ka hre bik lo tak tak a ni,” a ti.
Billboard Hot 100 chart hi kar khat chhunga US-a hla lar dan tarlanna a ni a, chart ranking siam nan hian all-genre US streaming (official audio leh official video), radio airplay leh sales data te chu tehna pawimawh a ni a, heng data atan hian Billboard hian independent data provider Luminate an hmang a ni.
“Choosin’ Texas” hian kar khat chhungin US-ah official stream maktaduai 21.8, radio airplay ngaithlatu maktaduai 58.3 leh sales 6,000 a la nei thei a, hei hi a kar 23 nan chart-ah a No.1 pui leh ta a ni.
Stella Lefty “Boston” chu No.2-ah bawk a la awm a, Morgan Wallen “Been by Now” chu No.4 atangin No.3 a kai thar leh ta a, heti hian chart top three-ah country hla vek a lang a, kuminah he chart top three, top four leh top five-ah country hla hlang a lan hi tum 16-na a ni ta a, chart history-ah kum khat chhunga Hot 100 chart-a country hla chet that ber kum a la ni.
Chart No.1 hlui Ariana Grande “Hate That I Made You Love Me” chu No.5 atangin No.4 a kai thar leh ta a, Tame Impala leh JENNIE “Dracula” chu No.5 a rawn kai ve leh ta bawk.
Chart No.1 hlui Taylor Swift “I Knew It, I Knew You” chu No.3 atangin No.6-ah a tawlh a, Karol G “Bby WOW” chu No.10 atangin No.7-ah a insawn a, he chart-a Karol G tawn san ber a la ni. Olivia Dean “So Easy (To Fall in Love)” chu No.7 atangin No.8-ah a tawlh a, a hla dang “Man I Need” pawh No.8 atangin No.9-ah a tawlh a, Ella Langley hla dang “Be Her” chu No.9 atangin No.10-ah a tawlh ta bawk.