HSSLC Results: Sawrkar vs Private

MBSE hnuaia HSSLC exam results 2023 chu nimin May ni 19 khan tihchhuah a lo ni leh ta a. A pumpui (overall abstract) ah pass percentage 78.66 a ni a, nikumah pass percentage 82.07 aia a hniamna hi 3.41% a ni.
Hetih lai hian stream hrang hrangah, Arts chuan nikum result a pha lo hle a, Science leh Commerce erawhin nikum an khum ve ve thung.
Management wise-ah kumin hian sawrkar enkawl sikul aiin private sikul an ti tha zawk leh a, pass percentage a insan hleih leh hle.
Zaa za pass vekna school zingah sawrkar enkawl sikul an lang lo va, Top ten-ah pawh sawrkar sikul lam an nil bawk. Zaa za passed vekna school hi kuminah 65 niin, failed vekna school hi Arts leh Science-ah pakhat ve ve a awm a. Nikum khan passed vekna school 61 awmin, failed vekna school a awm lo thung.
HSLC leh HSSLC result-ah hian sawrkar enkawl sikul aiin private sikul ten result an nei tha zawk deuh zel a, khaikhawma private sikul aia sawrkar enkawl sikul result a that zawk tum hi a la awm lo a tih theih hial awm e. Hei hian enge a entir kan tih chuan, englai mai pawha result hniam zawk an nihna hi sawrkar sikul lam hian an la na lo va, an vei lo va, private sikulte el pawh an tum lo tihna a ni.
Management lamah han khaikhin ila, sawrkar enkawl sikulte hi a enga kimah an changtlung zawk vek a tih theih ang: trained teacher an ni vek a, hlawh a sang em em zawk a, facility leh equipment pawh an nei tha zawk a, infrastructure lamah an phuisuiin an changtlung em em zawk bawk. Heti chunga private sikul an tluk thei lo hi chu a manganthlak deuh chu a ni e.
Delhi sawrkar kan sawi fo a, kum nga chhung lekin education hmasawnna a zuanin an zuantir thei a; keini aia chhangchhe zawk an ni. Kan sawrkar hian a tum tak tak chuan, hmasawnna zuang tur hian Delhi sawrkar aiin chance leh advantage a nei tha zawk hial awm asin.