England tan insiamremna hun a awm lo – Tuchel

England tan insiamremna hun a awm lo – Tuchel
World Cup last-16 game pakhatah Thawhtanni khian England chuan tuipui zawl atanga hmun sang tak (high altitude) a nih avanga ram dang team talbuai fona Mexico City khawpuia Azteca Stadium-ah kumin World Cup thlengtu pathum zinga pakhat Mexico an luhkhung dawn a, an head coach Thomas Tuchel chuan a team-te tan insiamrem (adapt)-na hun a awm loh thu leh a nih ang anga an inlan tawp a tul thu DR Gongo hneha last 32 an paltlang hnu lawk khan a sawi.
Azteca Stadium hian sea level atanga tehin feet 7,200 zeta sang niin, heti ang hmun sanga khawsa thang lo tan chuan boruak a lo pan tawh a, atmospheric pressure tehna barometer-ah a kawk hniam tawh a, kan tawk zawngin kan thisenah boruak a lut tlem tawh a, infiammite thaw a chham fo a, tualchhung mite an buai loh laiin mikhual tan harsatna lian tak a thleng thin.
Hetih lai hian Mexico chuan tun World Cup-a an game khelh tawh palite hi hmun sangah vek an la khel a, chu’ng zinga pathum chu Azteca Stadium-ah niin, a dang pakhat pawh high altitude hmun tho Guadalajara niin, hei erawh a ziaawm hret a, feet 5,000 vel lek a ni!
An hmachhawp thlirin German pachal Tuchel chuan Mexico nena an inhmachhawn turah high altitude avangin mualneitu team lamin advantage lian tak an nei bik dawn tih a sawi chhuak a, England tam tan taksa lama chuti ang hmun do hneh thei turin insiamremna hun a awm lo tih a tarlang tel.
England boss chuan, “Heti ang hmun nena inmil thei tur chuan hun rei zawk a ngai a, keini lahin kan game khelh inkarah ni thum bak hun kan nei si lo a, Mexico tan hamthatna lian pui a awm bik dawn ta a ni,” a ti.
Zirbingna lamah chuan heti ang hmun sanga buai loa insiamrem thei tur chuan a lo berah pawh chawlhkar khat emaw hnih emaw tal a ngai a, chuti ang a nih loh chuan taksain a mamawh tawk red blood cell insiamchhuak turin hun a awm lo tih a ni.
Hei hi a nih laiin England hian Mexico an hmachhawn hma ni hnih la awmah he khawpui hi an thlawklut thei chauh a, chak loh pawhin chhuanlam a tha ting dawn tihna a ni mai!
Tuchel hian an tana inkhelh hautak theih dan tur a sawi rualin dawih aw a pu reng duh bik lo a, “Harsatna tam zawk pawh lo thleng raw sek sek chu mi atan kan inpeih vek tawh e.
“Heti ang harsatna tak hi kan hmachhawn leh buaipui tur pawh a ni ve reng a, chuti ang atana kan inpeihchhuak tawh tih lantirna kan pholang tawk tawhin ka hria,” a ti.
England hian kum 60 liamtaa World Cup trophy an lo sualchhuah ve tawh chhunzawmna kha tun thlengin an la nghakchhuak zo lo a, Nilaini zana Congo nen an inkhelh tum pawh khan an captain goal thun thei Harry Kane awm lo se tla daih thei an ni!