Villa an chak awlsam

Ningani zan khan Europa League quarter-final khelh zawh a ni ve leh ta a, semi-final lut a hriat kim ve leh ta chiah. Quarter-final thawhkhatnaah 3-1 a chak tawh Aston Villa chuan awlsam zawk; 4-0 in hnehna an chang nawn leh a. Awlsam taka Bologna paltlangin semi-final an lut. Aston Villa rual hian English club dang Nottingham Forrest pwhin an mualah hnehna an chang a, semi-final an lut ve bawk. Aston Villa leh Nottingham Forrest te hi semi-final ah an inhmachhawn zui leh dawn a, English club in Europa League final an khel ngei dawn tihna a ni nghal bawk.
Villa tan Bologna an nem
English Premier League-ah palina ni mek Aston Villa hian quarter-final-a an khingpui Bologna chu mikhual an nihna hmunah 3-1 ngawtin an hneh tawh a. An mual; Villa Park-a inlan zui leh tur an nih vangin semi-final lut chiang tluka ngaih an ni. Villa hian rin lawk ang ngeiin an mualah an khel tha a, 4-0 ngawtin hnehna an chang a. Aston Villa lakah Italian Serie A club Bologna chu tui ang an nem a ni ber mai.
Aston Villa hian an mualah bul an tan tha a, goal pawh an thun har lo. Fuh taka an khingpuite nawr tlang a, mawi taka ball an inpek kual hnuin Ollie Watkins chuan tha takin a tawp a khar. Watkins hian Morgan Rogers ball pek tha tak chu hnaite atangin a pet goal a, minute 16-naah hmahruaina goal a thun. Bologna laka hmahruaina goal thuntu Ollie Watkins hian Aston Villa tan inelna hrang hrangah goal 100 a thun tling chiah a, club tan hnuhma ropui a hnutchhia.
Hmahruaina goal an thun hnuin Villa an khel tha chhunzawm a, na taka an khingpuite nawr zui zelin goal hmahruai siamchhuaktu Morgan Rodgers chuan tha taka shot in goal a thun teuh hle a, Bologna si nghak Federico Ravaglia chuan a lo dang hman hlauh thung. Goal thun mamawh Rodgers hian goal thun theihna hun remchang tha zawk an hmu zui leh a. Handball vanga penalty an hmuh chu pet mah se si nghak Ravaglia a paltlang zo lo nawn leh a, si nghak chetha Ravaglia hian an team a chhanhim nawn.
Penalty thelh bawk mah se Villa an hawihil rei lova, goal an thun belh leh thuai tho. Throw-in atanga ball a dawn chu Bologna defender te inrinthulh karah Emiliano Buendía chuan near post-ah fuh zetin a thawlh goal a, minute 26-naah an goal hnihna thunin, an hmahruaina a tizau. An mualah si hnihin hma an hrai a, si belhkhawmah si li ngawta an chungnun tawh vangin Villa hi semi-final lut chiang tluk an ni tawh a, an dinhmun a tha tak zet tawh.
Dinhmun tha takah ding tawh mah se Europa League-a a team enkawl champion pui thei tak Unai Emery-a’n a la duh tawk mai lova, goal tam zawk thun turin player te a nawr. Ngam taka an khingpuite nawr zui zelin chawlhlawk hmain goal an thun belh leh ta nge nge. Villa tan hianMorgan Rogers chuan minute 39-naah an goal thumna thunin an hmahruaina a tizau belh leh zual. Games 11 zet goal thun lova a hawihil tawh hnuin Mrogan Rodgers chuan goal a thun ve leh ta nge nge a. Hei hi a tan leh club tan pawh thhil tha tak a ni a, an tlarhma a hriam leh zual ngei a beiseiawm. Rodgers goal thun nen hian 3-0 a hmahruai chungin Aston Villa in chawlhlawk an hmang.
Chawlhlawk hnu lamah inkhel a hmuhnawm chhunzawm a, Italian club Bologna in an mualpho thui lutuk hliahkhuh nan goal thun ngei an tum hle. Goal thun tumin an khingpuite nawr thin mah se a tawp an khar tha thei lova, goal an chhuah belh leh ta zawk. 3-0 a hmahruai tawh Aston Villa tan hian Ezri Konsa chuan minute 89-naah an goal lina a thun a, an chakna a nem nghet. Konsa goal thun hnuin goal dang a luh belh thei tawh lova, Aston Villa chuan Bologna chu si belhkhawmah 7-1 ngawtin an sawp a. Phu takin semi-final an lut. Semi-final-ah EPL-a an elpui Nottingham Forrest an hmachhawn zui leh dawn a. Forrest hi ram dang club te ai mawhin an huphurh thei zawk tura ngaih a ni.
Forrest an vannei zel
Robindhood-a te khua Nottingham Forrest hian quarter-final thawhkhatnaah vanneihthlak takin tlawm an pumpelh a. Own-goal hmanga tlawm an pumpelh chu vanneihpui zelin an mualah 1-0 a chakin FC Porto chu si belhkhawmah 2-1 in an hneh hram a, semi-final an inhlangkai.
Forrest hian an mualah hnehna chan ngei tumin tan an khawh a, an vanneihnain a pui hle bawk. Inkhel tan atanga minute 7-na lekah Jan Bednarek hnawhchhuah a ni. Hma takah tam zawk an ni hi Forrest in an chhawr tangkai hle. Tam zawk an nih hnu lawk minute 12-naah Morgan Gibbs-White goal thun chu chakpuiin semi-final luth nan an hmang zui ta a ni.