EPL Player of the Season Haaland

Kum 22 mi Manchester City goal thun khawl Erling Haaland chu Inrinni khan Premier League Player of the Season atan thlanchhuah a ni.
Norwegian hian season kal laia league game 35 a khelh tawh atangin goal 36 a tilut tling tawh a, a hmaa Premier League season khat chhunga goal khung hnem ber record (34) kha a break der tawh!
Haaland-a record-breaking debut campaign hi a la tawp mai lo a, a zawna City league title pathumna a sualchhuahpui bakah Champion League trophy beisei tur a la nei.
Premier League season khata goal 34 thun tling pahnih Andy Cole leh Alan Shearer-te record kha kum 20 dawn a din hnuah he Norwegian palian hian a rawn khum ta a, Premier League club 20 captain theuhte bakah football expert rual awmna panel leh mipuiin Premier League Player of the Season atan hneh takin an thlangchhuak.
He chawimawina hi a zawnin kum li chhung chu City player-te vekin an dawng ta a, Kevin De Bruyne khan 2019-20 leh 2021-22 khan dawngin Ruben Dias kutah 2020-21 award a lut a, Haaland a rawn lang ve ta a ni.
Haaland hian a elpui dang De Bruyne bakah Arsenal player pahnih Bukayo Saka leh Martin Odegaard, Manchester United star Marcus Rashford, Tottenham Hotspur striker Harry Kane leh Newcastle United defender Kieran Trippier-te a hmakhalh.
Record siama vote 82% hmuin Football Writers’ Association Footballer of the Year lawmmawn a dawng tawh bawk.
Haaland hian nizana Premier League season tawp zan inkhelah Brentford laka goal a khung leh chuan Premier League top scorer a nihna hi a belhchhah leh thei ang.