Last minute goal hmanga champion Bayern

Last minute goal hmanga champion Bayern
Hun pekbelh minute 89-a Jamal Musiala goal thun hmangin mualneitu 1. FC Koln lakah 2-1 hnehna an chang a, Bayern Munich chuan season tawp ni inkhel ngaihven hlawhah Borussia Dortmund lehpelin a zawna a tum 11-na atan Bundesliga title an hlawhchhuak.
An elpui lian ber Dortmund kha Mainz hneha kum 2011-12 hnu lama an title hmasa ber hlawhchhuak thei tur an nih laiin Inrinni inkhel dangah 2-2 draw an hlawhchhuak thei ta chauh a, Bayern tan champion-na kawng bawk an hawnsak leh ta a ni.
Bayern Munich leh Borussia Dortmund hian league khelh 34-ah point 71 ve ve hmuin, goal difference-a sang zawk Munich club an dingchang a, Dortmund tan vanpui a chim a ni ber e!
|an atanga minute riatna lekah Kingsley Coman chuan mikhual team hmahruaina goal khungin, he goal khat hi Bayern-in an chakpui mai dawna lan hnu minute 81-ah Dejan Ljubicic chuan penalty atangin Cologne siphurh a sut a, Dortmund fans tan chanchin ngaihnawm a nih hman hnu last minute-ah Musiala chuan lawm avanga away fans sapatalna goal thunin, inkhelh banah Dortmund player leh fan-te an ngui ruai!
He inkhelah hian first half-ah Borussia Dortmund forward Se-bastian Haller-a penalty pet dansak a ni a, a hun tha hmuh kha goal-ah chantir se Bundesliga champion tur a dang daih mai thei!
Kumin March thlaah Julian Nagelsmann thlakin Thomas Tuchel chuan Bayern a enkawl tan a, season harsa takah a team a dam-khawchhuahpui hram a ni.
Inrinni inkhel tawp atanga rei vak loah Bayern Munich chuan Bayern player an nih ve ve laia belhkhawma title 14 la tling chief executive officer Oliver Kahn leh sporting director Hasan Salihamidzic an ban thu an puang a, he boruakah hian manager Tuchel chuan, “Champion lawm aiah buaipui tur issue dang kan nei,” a tichhuak nghe nghe.
Bavarians hian kum 1999-2000 season tawp ni (final day) pawh khan table-a pahnihna ni chungin Bundeliga title an hlawhchhuak tawh a, khami tum khan Bayer Leverkusen hnehin champion lallukhum an khum a, kha thil an thlentir hnua final day-a pahnihna luah chunga champion leh thei hmasaber pawh anni bawk an ni leh.
FC Cologne laka an hmahruaina goal khungtu France winger Coman khan Paris St-Germain, Juventus leh Bayern thuam inbel chungin season tin title a la hlawhchhuak ziah a, professional footballer zingah amah ang hi an vang khawp ang.
Tarlan tawh angin, Dort-mund kha season tawp ni thlenga table-a hmahruaitu an ni a, Mainz 05 kha home-a hmachhawn an ni lehnghal a, dinhmun tha zawka ding an nih laia chaka champion mai thei khan point hnih an hloh then ta tlat a, kum tamtak chhunga league race chep berah Bayern bawk an dingchang leh ta zawk a ni.
Pathumna RB Leipzig leh palina Union Berlin-te pawhin season tharah Champions League football an khel dawn a; division hniam lamah Hertha Berlin leh Schalke 04 tla thlain, Bundesliga table-a 16-na luahtu VfB Stuttgart chuan inham-tanna hun remchang an hmu a, relegation playoff an khel ang.