EPL – United an tlawm leh tawh

Pathianni zan khan English Premier League khelh chhunzawm a ni a, season tharah bul tan chhe tak Manchester United chu West Ham United hneh lovin an tlawm. United an tlawm rual hian team lian Tottenham an tlawm ve bawk.
14-naah United
EPL a club hlawhtling ber Manchester United chuan season chhe tak an hmang mek a, hma an sawn hlei thei lo. Hma lam pan tura chak mamawh United hi West Ham United hmachhawn turin London Stadium-ah an lenglut. An len luhna mualah tlawm pumpelh teuh viau mah se hun tawp dawn tepa penalty an chawi vangin tlawm zawkah an tang. West Ham lakah an tlawm vangin an tlahniam leh zual sauh a, 14-na daihah an awm mek.
London Statium-ah United in bul an tan tha viau a, chawlhlawk hmain game an thunun hneh hle. Argentina rawlthar Alejandro Garnacho chuan goal thun theihna hun tha tak a neih chu uiawm takin a hlah a, goal bar a pet per. Garnacho hian a hun tha neih dang pawh a hloh zui leh bawk. Garnacho-a’n a hun tha neih a hloh zawn hnu hian Diogo Dalot chuan si nghak awm tawh lo chungin goal-ah a pet lui thei lo zui leh bawk a, United in an hun tha neih an hloh tlut tlut a, mualneitu West Ham an him hram hram a ni ber mai.
Chawlhlawk hnu lamah pawh United an hlauhawm zui viau a, hun tha nei bawk mah se si nghak Lukasz Fabianski an pal tlang thei chuang lo. United in an hun tha neih an hloh zel laiin West Ham in an hun tha neih chhun an chhawr tangkai a, goal an thun ta tlat thung. Hun tawp dawn hnaih lam minute 74-naah fuh taka an nawr tlang hnuin Crysencio Summerville chuan hnaite atangin a pet goal a, hmahruaina goal a thun.
Goal an chhuah hnuin United an khel tha zui viau a, goal an thun ta nge nge. Midfielder sawisel hlawh tak Casemiro chuan minute 81-naah hnaite atangin a tauh goal a, an si phurh a sut.
Casemiro goal thun hnu hian goal a luh belh thei lo reng a, an inhnehtawk a rinawm hman hle. Chak zawk an awm thei dawn lo emaw tih hnuin hun tawp dawn hnaiah West Ham in vanneihthlak takin penalty an hmu. He penalty hi Jarrod Bowen chuan goal kilah fuh takin a pet goal a, minute 90+2-ah hma an hruai nawn lehna goal a thun. Bowen goal thun hnu hian goal dang a luh belh thei tawh lova, West Ham lakah Manchester United chu uiawm takin an tlawm zui ta a ni.
Manchester United hian hun rei tak hnuah EPL-a bul an tan chhiat ber hun an tawng mek a, season kal mekah vawi kua khelin vawi thum chiah an chak a, tlawm zawkah vawi li ngawt an tang tawh. Match kua atang hian point 11 chiah an la hmu a, 14-naah an awm mek. United hi hmahruaitu Livepool aiin point 12 zetin an hniam zawk mek a ni. An mualah hnehna an chan nawlh vangin West Ham hian an chunga awm United an lehpel a, 13-naah an inhlangkai ve thung.
Palace an chak nawlh
West Ham in Manchester United an hneh nawlh lai hian Crystal Palace pawhin an mikhual Tottenham an hneh ve nawlh bawk.
Season thara chak harsat Crystal Palace chuan an mualah khingpui hautak Tottenham Hotspurs an hmachhawn. Khelh riat atanga point 13 hmu tawh Tottenham lakah hian minute 31-naa Jean-Philippe Mateta goal thun hmangin hnehna hlu tak an chang a, point thum an hmu nawlh. Tottenham laka point thum an hmuh vangin Eagles hian khelh kua atangin point ruk an hmu a, relegation zone chhuahsanin 17-naah an inhlangkai.