Morgan Wallen ‘One Thing at a Time’ a la No.1

Morgan Wallen ‘One Thing at a Time’ a la No.1
Morgan Wallen ‘One Thing at a Time’ album chu Billboard 200 (albums) chart-ah a No.1 a, a zawnin he chart-ah hian kar nga a No.1 tling ta. Hetihrual hian Melanie Martinez & Boygenius te pawh top 10-ah an debut a, Tyler, the Creator pawh top 3 a kai thar ve leh ta bawk.
Billboard 200 chart hi kar khat chhunga US-a album hralh tam dan atangin tehin chart ranking siam thin a ni a, album hralh zat chhut nan hian album tak tak hralhna bakah streaming atanga album hralhna tlukpui leh album-a hla mal hralhna atanga album tlukpui te belhkhawm thin a ni.
Morgan Wallen ‘One Thing at a Time’ hi kar khat chhungin US-ah copy 1,73,000 an hralh leh a, chung zinga 1,62,000 chu streaming atanga album hralhna tlukpui (on-demand official stream maktaduai 215.58) niin, album tak tak hralh zat chu 8,000 a ni a, album-a hla mal hralhna atangin 3,000 a tling thei bawk.
Morgan Wallen album hmasa ‘Dangerous: The Double Album’ kha chart-ah kar 10 a No.1 thei a, heti hian ‘One Thing at a Time’ kar 5 No.1 nen, he chart-a a No.1 tawh zawng zawng belhkhawm chu kar 15 a tling ta a, Bad Bunny lehpelin 2020 hnu lama he chart-a No.1 ngun lamah pahnihna a ni. 2020 hnua he chart-a No.1 ni ngun ber chu Taylor Swift niin, kar 20 a No.1 tling tawh a ni.
Melanie Martinez album thar ‘Portals’ chu 1,42,000 hralhin No.2-ah a debut a, he chart-a a tawn sân ber a la ni a, chart top 10 kai thei album pathum a neihna niin, a album hmasa ‘K-12’ chu 2019 khan No.3 a kai a, ‘Cry Baby’ chu 2015 khan No.6 a kaipui tawh bawk.
Tyler, the Creator ‘Call Me If You Get Lost’ chu 68,000 hralh lehin No.137 atangin No.3-ah a invawrh thar leh a, he album hi a deluxe reissue avangin hralh a kal thar leh a ni. A album hi 2021-a a tlangzarh tawh kha niin, No.1 te pawh a lo kai tawh a, a deluxe reissue-ah hian hla pariat a dah belh a ni.
Rock supergroup Boygenius full-length album hmasa ber ‘The Record’ chu 67,000 hralhin No.4-ah a debut. He group member Julien Baker, Phoebe Bridgers leh Lucy Dacus te tan he chart top 10-a an lan vawi khatna a ni.
Chart No.1 hlui SZA ‘SOS’ chu 64,000 hralh lehin No.5-ah bawk a la awm a, chart No.1 hlui bawk Taylor Swift ‘Midnights’ chu 61,000 hralh lehin No.7 atangin No.6 a kai thar leh a, Luke Combs “Gettin’ Old” chu 54,000 hralh lehin No.4 atangin No.7-ah a tawlh a, chart No.1 hlui Morgan Wallen ‘Dangerous: The Double Album’ chu 45,000 hralh lehin No.9 atangin No.8-ah a insawn leh hret a, chart No.1 hlui tho Metro Boomin ‘Heroes & Villians’ chu 42,000 hralh lehin No.8 atangin No.9-ah a tawlh a, Lana Del Rey ‘Did You Know That There’s a Tunnel Under Ocean Blvd.’ chu 38,000 hralh lehin No.3 atangin No.10-ah a tawlh ta bawk.

Get real time updates directly on you device, subscribe now.

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More