Eptuten police-te vote thlaktir ngei turin PM leh CEC ah thlen

Mizorama eptu party panga chuan Lok Sabha inthlan duty-a an chhuah avanga vote thlak ve thei ta lo, police 1047 te chu vote thlak tir ngei turin Prime minister leh Election Commission of India chief election commissioner hnenah an thlen.
Mizoram Police 1047 lai, Lok Sabha inthlana vote thlak thei loa siam an nih avangin an lungawi lo tih eptu party-te hian Prime minister leh CEC hnenah ziakin an thlen a, vote an thlak ngei theihnan hma la turin an ngen.
Prime minister Narendra Modi leh CEC Rajiv Kumar hnenah eptu party-te hian lehkha inang an thawn a. Mizoram State Armed Police Force (SAPF) company 15-a police 1047 chu Bihar, Uttar Pradesh leh Madhya Pradesh ah MP inthlan duty tura tirh chhuah an ni a, Mizoram bikah April 19-a vote thlak a ni dawn tih leh, inthlan buatsaih dan tur kimchang pawh hriat lawk vek a ni tawh chungin, heng police-te hi vote an thlak theihna dan ruahmanna engmah siamsak hmasa loin inthlan duty turin Mizoram pawna tirhchhuah an ni a, hetianga vote thlak thei loa siam hi state sawrkar hmalakna hnuaia dan bawhchhiatna lian tak a ni tih an sawi.
Eptu party-te hian Election Commission of India leh India sawrkarin tun Lok Sabha inthlana vote thlak vek tura vote nei zawng zawng zirtirna beihpui an thlak dan chu fakawm an tih thu an sawi rualin, Mizoram sawrkarin a hnuaia thawk police 1047 vote an thlak theihna tur remchang siamsak hmasa loa inthlan duty tura a tir chhuak chu ram danpui hnuaia an dikna leh chanvo bawhchhiat sakna langsar tak, mipui rorelna chawisang zel tura hmalakna kalha chetna a ni tih an thlen bawk.
An dikna chanvo bawhchhiat saka awm Mizoram Police 1047-te hian kumin June 4-a vote chhiar a nih hma ngeia vote an thlak ngei theih dan ruahmanna siamsak turin PM leh CEC te hi an ngen a ni.
He lehkhaah MNF president Zoramthanga, MPCC president Lal Thanzara, BJP Mizoram president Vanlalhmuaka, Mizoram PC president Vanlalruata leh AAP Mizoram president Andrew Lalremkima ten hming an ziahhnan a ni.