Eptuten sawrkar beihna tur liantham an hre lo – CM

Eptuten MNF sawrkar beihna tur liantham an hre loa, Lunglei Municipal inthlanah leh MLA inthlanah chak ngei an inring tih MNF president, chief minister Zoramthanga chuan a sawi.
Lunglei Municipal Council inthlan turah MNF Sub Hqrs Lunglei hnuaia LMC Campaign Directorate huaihawta Lungleia hun hmanah MNF president chuan LMC candidate tur engemawzat an tihfel tawh thu leh sawrkar ngei tura hma an lak tur thu sawiin, LMC seat 11 awm hi lak vek an duh a, Pathianin sawrkarna siam tura mamawh zat seat a pek a ring tih a sawi.
Pathian leh mipui zarah kumin kumtawp MLA inthlanah sawrkar leh ngei an inring a, an tum bawk tih a sawi a. Congress chuan MLA pahnih khat an neih chuan an vannei hle ang, tiin, ZPM pawh Assembly Session neih zawh takah a dik leh dik lo tih an hriatchian loh pawh an au pui dum dum a, ngaihdam an dilte a ngai leh hial tih a sawi.
“Kan sawrkar hi beihna liantham eptute hian an hre lo a. Khawvel tibuaitu Covid kha phurrit a tling lo tite in an sawi mai mai,” chief minister hian a ti.
MNF chu party entawntlak ber, hnam thuthlung meichher vuan tlattu an ni tih sawiin, “Kum 60 chuang rinawm taka kal kan ni a, Congress leh ZPM angin kan nghing ve lo. Lungawihlohna hote tein a ngam loh lungphum chunga rem chhoh kan ni a. MNF atanga mawina leh ropuina khum chhuak, a tawp thlenga rinawm leh si loa chhuak lehte hi kal fuh an awm ngai loa, a tawpah tumahin ka ui ka ar an ti ngai lo,” a ti.
MNF vice president Lalthlengliana chuan Congress chu thingkung lian tak, a chhung kawrawng vek tawh ang an ni tiin, a tlem berah kum 15 chhung chawr chhuak tawh loh tur an ni tih a sawi. ZPM pawh thu puarpawleng mai maia sawrkar lai bei ngar ngar, sawrkar kalphung tha zawk tura thurawn pek tur hre si lo, sawrkar lai an beihna pawh ram hnuk khawih pha awm lo, an sawrkar huna thil tha an tih tur sawi tur nei lo an nih thu sawiin, hetiang mai mai hi Zoram kaihruai tura mipuiin an thlan a ring lo tih a sawi.