Espanyol muala mualpho Real
La Liga home game-a Real Madrid ngam laklawh Espanyol chuan Inrinni zan league match-ah sikhat faiin an mikhual Bernabeu club an hneh leh tawh a, ti hian, Spanish top flight bika Real an mikhual hnuhnung vawirukah vawithum ngawt Espanyol an chak tling ta!
He result avang hian Real Madrid chuan league table-a point li ngawta hma hruai fal theihna hun remchang an bawhpelh a; Inrinni inkhel dangah table-a pahnihna luahtu Atletico Madrid chuan sihnih faia an mikhual Mallorca an hneh avangin a sang pahnih inthlauhna hi khelh 22 ve veah point khat chauh a ni ta.
Carlo Ancelotti team hian league match 22-a point 49 an hmuh tawh atangin hma an sawn zo lo a, heti zat game-ah Atletico chuan point 48 hmuin Real mawngphe an hmu hnai zual!
Espanyol chakna goal awmchhun kha hun tawp hma minute nga chauh awm tawha mualneitu team counter-attack hrinchhuah niin, Carlos Romero chuan Thibaut Courtois-a ven goal-ah he match-a goal lut awmchhun a tilut a; an kawtkaia an point thum hlawhchhuah nen Espanyol hi a hniam pathum chung chiahah point 23 hum chungin 17-na an luah.
Inrinni inkhelah Real Madrid lam khan first half-ah hma an hruai hman dawn emaw an intih laiin Vinicius Jr-a goal pet kual luh mawi zet insiam chhoh laia Kylian Mbappe foul avangin Brazilian goal hi pawmsak a ni lo.
Rodrygo pawhin second half lamah Real goal khawkheng a kheng thlawn teuh viau a, a goal tur ni mai awma lang hman chu home keeper Joan Garcia chuan dive chungin a danchahsak.
Minute tlemte hnuah Garcia bawh hian he match-a a vawisarih save-na leh a ‘best save’ ni zui ta lantir lehin Mbappe goal tur a dang.
Garcia vek hian second half-ah Vazquez leh Jude Bellingham-te goal tur a tithuanawp bawk.
Mbappe chawna a tlawhsak avangin Romero chu yellow card chauh pek niin, kha khan Real bench lam boruak a tilum hat a, mahse, boruak tha lo zawk a thleng zui lo a, Spanish defender goal awmchhun avang khan mualneitu team chuan La Liga table-ah bottom three an chhuahsan theih phah ta a ni.
February ni 11 Champions League play-off lama Manchester City hmachhawn tur Real buaina belhchhah turin an German defender Antonio Rudiger chu first half-ah chawn tha na ni ngei tura ngaih vangin thlak a ni a, a hliam dinhmun endikna chanchin hi hmuh mai tur a la awm lo.
Ancelotti team-in hun tawp dawn lamah an siphurh sut tumin a nawr na zual a, goalkeeper Courtois pawh a pawlte corner chhuih chang turin a rawn tlanchhuak hial a, mahse, Espanyol an nghing duh ta bik lo a, season kal laia Real Madrid vawili chak zawn lai titawpin, tun season-a Bernabeu club tlawm vawithumna an thlen zui ta bawk.
Italian manager mangang khan Luka Modric, Brahim Diaz leh Raul Asencio-te chu khelmualah nawrlut bawk mah se an ni pawh hian eng ‘magic’ mah an thlen zw bik loh laiin minute 85-ah defender Romero chuan Omar El Hilali through-ball vawrhluh hmangin team pahnih danglamna thlentu goal a khung zui ta bik a ni.
Tarlan tak angin, inkhel danga sihnih faia Mallorca hnehtu Atletico Madrid chuan kartawp Inrinni zan khian Madrid derby khel turin Santiago Bernabeu an lut dawn a, hmahruaitu thar hriltu a nih theih dawn avang pawhin hei hian ngaihven a hlawh zual ngei ang le…
Nizan result tarlan hman loh inkhel pakhatah table-a pathumna luahtu Barcelona chuan Alaves an hmachhawn a, an chak chuan point 45 nen an chunga Madrid club pahnih chuang an hnaih ve leh sauh ang.
Espanyol muala mualpho Real
Get real time updates directly on you device, subscribe now.
Prev Post
Next Post