P.C.Lawmkunga
-- Advertisement --
I ngaihtuah zâwng a ni ve em, kan medical college hming kan thlâk sek mai hi? A hming hmasa ber, mawi leh huapzo ang reng tak MIMER (Mizoram Institute of Medical Education and Research.2017-2018) kha kan hman tlângnêl tak tak hmain kum khat hnu lekah hming chhumbûl ang reng tak ZMC (Zoram Medical College. 2019) tiin min thlak sak a. Chu hming chu kum nga zet hmanga kan hre bel dawn chauh tihin nimin maiah khan ZMCH (Zoram Medical College and Hospital. 2025) an rawn tih leh tak hi! Heti tak maia kan medical college neih chhun hming lehburh kan engto em em mai hi harh tharna dangdai tak a ni ngei ang. He college hi a hming thlaka kan inel dawn a nih chuan ministry lo ding leh tur chuan eng hming takin rawn thlak leh ang maw? A college leh thawktute tak pawh hi an lu a hai viau ang tih hlauhawm tak a ni.
Hming thlak hi a tul hun a awm a ni ngei ang. Bible-ah meuh pawh hming thlåk hi kan hmu fo mai a. Pathianin Abrama leh Saraii chu Abrahama leh Sari tiin a thlak sak a. (Genesis 17.5, 15.) Jakoba pawh Israela ti-a thlak a ni a. (Genesis 32.28 ). Saula chu Paula ti-a koh a ni ta bawk. (TT 13.9). Josua hming hmasa chu Hosea a ni a, Mosian a thlak sak a ni. (Number 13.16). A dang pawh Bible-ah hian a la awm nual ang. India ramah pawh hian khawpui leh hmun hming thlak a awm fo bawk. Bombay chu Mumbai, Madras chu Chennai, Calcutta chu Kolkata, tun hnaiah Rajpath chu Kartavya. Sawisen a ni awm lo ve. Mimal pawh hian mahni hming tihdanglam dilin magistrate hmaah affidavit an thehlut fo bawk a ni. Hengte hian chhan tha tak an nei vek awm e.
Mahse kan medical college hming kan thlak ve fo thin hian behchhan mumal tak a nei lo niin a lang, a thlaktu Sawrkar leh Department lam hian mipui hriatah an la sawifiah awm kan hre lo a nih si hi. Tuna an thlakna hminga belh ‘hospital’ hian he medical college hi a tilang ropui sawt em? Medical college rêng reng chuan zirlai (under graduate leh Post graduate) te inzir nan hospital behchhan a nei ngei tur a ni, tih hi sawi ngai lova chiang sa a ni. Chuvangin kan medical college hminga ‘hospital’ tih telh kher hi thil chuangtlai (supefluous) a ang ber. “Lawmkunga Minister, and MLA” tih nen a thuhmun reng.
Vanglaini January 31, 2025-a chhuakah chuan ti hian a inziak a. “Governor tarlan danin ZMC hian State Referral Hospital, Falkawn chu a ken tel tho avangin a hmingah ZMCH tiin Mizoram sawrkar chuan a thlak a, notification tih chhuah atang chuan ZMCH tih a ni zel tawh ang” tiin. Chhuanlama “A ken tel tho avangin” tih hman rikngawt te chu chhuanlam chhuanawm tak a ni thei lo. Thil chi tam tak hian khaikhawmna hming an nei thin a ni ngai a. Shalom Kohhran kan tih hian a Kohhran mipui leh fellowship department hrang hrang kha a huam nghal a. Chutih laiin, “A keng tel tho ve” tiin fellowship department hrang hrang TKP, BKHP, BMP tihte kha ziak tel duah ila, a nalh lo viau ang. Duhthawh deuhten an hminga “Rev. Dr. Andrew Johnson BD; M.Th; D.Th.” tia an ziak duah te hi kan hmu fo thin ang a. Miin doctorate a neih tawh chuan a hnunga title pathum te khi a nei sa tih a chiang a, ziak lan chiam kher kha hun leh hmun tihek mai a nih bakah uanthuanna lawilo (vanity) a ni ringawt mai a ni. Society ni tawh lova sawrkar ta pumhlum ni tura Department of Hospital and Medical Education hnuaia dah a nih dawn tak avanga tih ‘hospital’ rikngawt pawh hian hming thlakna ‘chhan’ hi a ‘chhan’ dam zo meuh lovin a lang.
Chuvang chuan, emaw hei vang hian emaw, eng vang pawh ni se, medical college hming hnungbeta ‘hospital’ tarlan kher hian a tihnamchawm ru deuh tlat mai a, keini aia changkang zawkte hi chuan an ching lem lo a nih si hi maw le. Education and research tihah hian an lungawi tawk hlein a lang.
Han hawi zau deuh ila, kan thusawi nemnghehna tur a awm nual ang. Imphala hospital lian ber chu RIMS tih a ni a, chu chu Regional Institute of Medical Sciences tihna a ni, ‘hospital’ tih an telh kher lo. He medical college hi a tira a hming chu RMC (Regional Medical College. 1972) tih a ni a. A hnu-ah remhre takin RIMS (1995) tiin an thlak ta a ni. Manipur State medical college pawh JNIMS (Jawaharlal Nehru Institute of Medical Sciences) an ti mai a. Kan medical institutes hriat lar tak NEIGRIMS leh AIIMS leh JIPMER (post graduate zirna) te hian ‘hospital’ tih an pu tel kher lo chu a nih hi. An ngaih pawimawh fo zawk chu thil thar hmuh chhuah tumna ( research) hi a ni tih a lang reng mai, an hming atang khian. University leh institute dang reng reng hian zir thiamna (education) an kalpui laiin thil tangkai hmuh chhuah thar hi an thupui ber a. Subject hrang hrang arts leh science field-ah te research nasa tak tiin doctoral research an bei a. Medical institutions te chuan natna hrik hnathawh dan leh chu hrik lo dodal dan tur chu hmuh chhuah thar tuma an beih a ngai fo thin. Covid-19 len laia vaccines te kha tunhmaa awm ngai lo, rikrum thil (emergency) a research beiha hmuh chhuah an nih kha. Entir nan, vaccine chi khat covaxin chu Bharat Biotech, ICMR leh National Institute of Virology tang kawpten research beihpui thlaka rawn hmu chhuakin, kan hmang chur chur a, kan thatpui hle a nih kha.
Chuvang chuan hming hran hran, huapzo mang si lo vuah thlak sek ai chuan ‘medical education and research’ tih hming pu hian vuah hlen law law ila, tichuan a hmingah na na na chuan rual kan pawl zawk ngeiin a rinawm. A din chhuaktu ministry-in Mizoram Institute of Medical Education and Research tia an lo vuah kha a iaiawm loh ta berin a lang ta awm e. A rêng reng thu-ah hetia kan medical college hming kan thlak chhèn hian khulama thuneitu Ministry of Health and Family Welfare leh National Medical Commission (kum 2020 atanga ICMR thlaktu)-a thawktute lu pawh kan tihai tel ang tih hi ngaihtuah theih tak a ni. He kan medical college neih ve chhun tihhmasawn zel nan hian hming thlak ringawt aia buaipui tur hi kan la ngah hlein a lang bawk si a. Enthlak lai kan la ni bawk si nen!
Lo ngaihtuah ve teh ule.