EU leh Nato beih kan tum lo – Russian foreign minister

On Sep 29, 2025 6 0

EU leh Nato beih kan tum lo – Russian foreign minister
Russian foreign minister chuan EU emaw, Nato member ram emaw tumah beih an tum lo tih a sawi a; mahse, Moscow nektu chu na taka an chhan let tur thu a sawi.
Inrinni zana UN General Assembly-a thu a sawinaah Sergei Lavrov-a chuan khawthlang ramten Russia tana hlauhawm an siam chu ‘a pung tual tual’ tih a sawi.
Israel hmalak mekna pawh sawiin Russia chuan October 7, 2023-a Hamas beihna chu an dem a, chutih rual chuan Gaza-a Palestinian-te chu ‘rawng taka thah’ an ni leh West Bank luah an tum chu ‘a tulna engmah awm lo’ tih a sawi.
Israel chuan a hmain Gaza-a beihpui an thlak mek chu Hamas hneh nan thil tul niin a sawi ve thung.
October 7, 2023-a Hamas-in Israel beia mi 1,200 chuang an thah leh hren tura mi 251 an hruai hnua Israeli sipaiten Gaza-a beihpui an thlakah mi 65,926 an thi tawh niin Hamas health ministry-in a sawi.
Israeli-in Middle East-a ram dang a bei thin pawh tha a tih loh thu Lavrov-a chuan a sawi a, heng lai ram bial ‘puah darh’ a hlauhawm phah niin a sawi.
Israel hian Hamas chhut chimih a tumnaah Middle East-a ram dang, Qatar thlengin a bei a ni.
Iran chungchangah Lavrov-a hian khawthlang ram chakte chu Russia leh China ramten indawr tura hma a lakna chu hun tawpah hnawlin Zirtawpni atangin hrek an nih leh phah niin a sawi a. Russian foreign minister hian hrek leh hi ‘dan lo’ a tihsak.
Iran hrekna hi Britain huna Pathianni zing, Inrinni zan lai dar 12:00 (India-a Pathianni zing dar 05:30) atanga kalpui tan kha a ni.
Europe-a boruak sa mek chungchangah Lavrov-a chuan, “Russia tana hlauhawm siamna, Nato leh European Union bei mai tura sawina thlengin a pung nasa hle a. President Vladimir Putin-a chuan hetiang boruak siam hi a duh lo,” a ti.
“Russia hian hetiang rilru hi a pu lo va, a pu ngai lo va; kan ram min nektu erawh a chhanna tha tawk thutlukna kan siam hnan ang,” a ti.
Moscow hian Denmark-in an ram thlawhna tumhmun chunga drone thlawk an sawi a, hei hi tute emaw ‘thiam tak’ thil tih nia a lan thu an sawi a, Russian-te an inrawlh em tih erawh finfiahna a awm lo.
A hmain Estonia chuan Russia-in indo thlawhna hmangin an ram chung an dai tih a lo sawi tawh a, Nato air defence mission chu Poland-ah pawh Russian drone hmuh a nih avangin an inchhawp hnai bawk.
Russia hian Ukraine a bei mek a, kum thum dawn an indo tawh hnuah Kyiv thawhpuitu ramte lakah hian huang zauh a tum em ni tih zawhna a awm mek a, hei hi Lavrov-a chuan UN inkhawmpuiah hian chutiang an tum lo tih a sawi a ni.