EU nena inrem hnuah India-in US pawh a dawr zui zel

European Union (EU) nena sumdawnnaa inremna lian tak an ziah hnuah India leh US ten hetiang inremna bawk siam tuma indawrna an kalpui mek chhunzawm reng a ni tih India-a a hre chiangin a sawi.
Indian palaite hi American palaite nen thil tha tak sawi chhuak turin an indawr chhunzawm reng thi niin Nilaini khan a sawi a ni.
US nena inremna siam tuma inbiakna hi nikuma President Donald Trump-a’n Indian bungrua an lak luha chhiah 50% a lak atang khan chawlhsan a ni a. Tunah hian engkim peih a ni tawh a, lehlam lehlama sorkar hotu pawimawhte paltlang chauh a ngai tawh niin a hretu hian a sawi a ni.
India leh EU hian Thawhlehni khan Delhi-a India-EU Summit-ah free trade agreement (FTA) an ziak a, “He inremna hi US nena inkungkaihna siam tur hnawlna a ni lo va, India tan America-a inzawrh hi EU-a inzawrh tluk thovin a pawimawh a ni,” a ti.
“US nena inremna siam tumah hian kan thleng thui tawh hle a. Rah duhawm tak a chhuah theihna tur kan thleng tep a, lehlam lehlam hi an la inbe reng,” a ti.
External Affairs Minister S Jaishankar-a chu February 4-5 hianleilung hausakna pawimawh bik chungchang sawiho turin US kaihhruai ministerial meeting-ah Washington-ah a tel dawn a, Secretary of State Marco Rubio-a nen an inhmu dawn bawk a. Hei hi ram pahnih insumdawn tawnna tura thil tihfelna atana pawimawh a ni thei dawn tih a sawi.
India leh US hi nikum khan inremna siam tumin thawh eng emaw zat an inbe tawh a; mahse, Trump-a’n Indian bungrua an lak luhah chhiah 25% lain a hnuah Russian tuialhthei a leisak avanga hrem nan 25% dang a lak belh leh a, inremna siam hman a ni ta lo.
Hei bakah hian Trump-a’n May thlaa India leh Pakistan indo kha a tihtawp nia a sawiah an thu a inhmu lo va, US-in an rama pem lutte a kalpui danah an inrem lo va, American thuneituten India-in energy leh ram venhimnaa Russia a kawp an sawisel fo bawk avangin an karah khi a awm a ni.
US nena inremna siam theih loh khan India hian EU chu FTA a ziahpui a; mahse, Indian thuneitu chuan Delhi hian hei hi Washington-in chhiah a laksak leh thil dang vanga khaw dang hawia ti a ni lo tih sawiin India-EU Summit-ah pawh hemi lam hawi hi chu sawi lan a ni lo hrim hrim niin a sawi.
“India-in EU-a a thawn chhuah hi $ tluklehdingawn 76 man a ni a, US-ah $ tluklehdingawn 86 man a ni thung a. US hi kan tan a pawimawh dan a dang chuang lo,” a ti.
“An pahniha thil thawn a tam hian hna leh thil siam a pung dawn a. US-a inzawrh hi a pawimawh a, pawimawh lo ni sela inremna siam tumin kan buai lo vang,” a ti.
China chungchangah India chu Regional Comprehensive Economic Partnership (RCEP)-ah tel tumna a nei lo niin a sawi bawk a. Delhi hi Asean member ram 10 leh Australia, China leh Japan tela ram dang pangaten kum 2020-a RCEP an ziahah khan a tel ve duh lo a ni.