Europa League inchinfel zan
Nilai zanah UEFA Champions League – League round khelh zawh a ni a, chinfel hmasak ngai an inching fel hlawm. Zan hi football ngainatute tan men rei zan a ni zui leh dawn a, Europa League-ah league round khelh zawh niin, last 16 lut chiang tur, play-off khel zui tur leh tla tur tihchianin a awm ve leh dawn.
Aston Villa mualah Salzburg
Season kal meka khel tha tak Aston Villa chuan Villa Park-ah RB Salzburg an mikhual dawn. Villa hian an mualah hnehna an chang a nih chuan table chung ber luah chunga League round kharna hun tha an nei a. Table chung ber an luah em loh pawhin pahnihna ni chungin League round an thlah dawn hrim hrim tho.
Europa League-ah hian French club Lyon leh EPL club Aston Villa ten last 16 an lut chiang tawh a. Anni pahnih hi chu zaninah tlawm pawh ni se pariatna hnuai lamah an awm thei tawh lo. EPL-ah pathumnaa awm mek Villa hi an muala inlan tur an nih vangin chak theihna hun tha an nei a, 28-naa awm mek RB Salzburg hneh thei ngei tura ngaih a ni.
Aston Villa hian an match hnuhnung berah Newcastle United chu 2-0 in an hneh a, EPL-a hmahruaitu Arsenal nen point li chiahin an inthlau tawh. EPL-ah champion tuma tan khawh zui tur an nih vangin last 16 an luh chian tawha Europa League lamah an player thate an hahchawlhtir a nih pawhin a mak lo ang.
Lyon vs PAOK Salonika : Table-a hmahruai mektu Lyon hian an mualah PAOK Salonika an mikhual dawn a, pakhatna ni chunga League round khar turin an mualah chak ngei tumin tan an khawh nasa hle ang. An mikhual tur PAOK hian khelh sarih atanga point 12 hmuin 12-na an luah mek a. Lyon an hneh thei a nih chuan table-ah hma an sawn dawrh thei dawn a. Hei vang hian Lyon hneh ngei tumin tan an khawh nasa hle ngei ang.
Nottingham Forrest : Europa League-ah English club pahnih an inlan a, an indinhmun erawh a inthlau hle. Aston Villa in last 16 an luh chian tawh laiin Nottingham Forrest erawh chuan 16-na an luah ve mek thung. Forrest hian pa 7-naa awm mek Ferencvaros an mikhual dawn a, last 16 luh beisei zui thei turin an mualah chak ngei an mamawh ang.