Europe-a player tha zual panga

Europe khawmual hi football ngaihsanna khawmual a ni a. He khawmuala ram hrang hrangte hi football-a ram ropui tak tak an ni hlawm. Europe leh South America khawmual hi football ngaina, football tiropui leh zualtute an ni. Football inelna ngaihhlut hlawh ber FIFA World Cup-ah pawh he khawmual pahnihte hi an inchampion chhawk a, khawmual dang atangin World Cup champion an la awm lo. South America khawmual aiin Europe hian World Cup-a champion thei ram an neih ngah zawk nghe nghe. Heti a nih vang hian Europe a player tha filawrte hi chu khawvela player tha filawr an ni tel nghal a tih theih. Tun tumah hian Europe-a football player tha zual kan tarlang ang.
5. Robert Lewandowski
Poland leh Barcelona forward pawimawh Lewandoski hi tunlai player tha, goal thun thei ber pawl a ni. Lewandoski hi Fifa best player-ah tum hnih thlan a ni tawh a, UEFA Men’s Player of the Year-ah thlan a lo ni tawh bawk. Bayern Munich tan a khelh laiin season hnih chhung chu European Golden Shoe a dawng zawn bawk. Football a chawimawina ngaihhlut hlawh Ballon d’Or dawng ngei tura ngaih a nih kumah Covid 19 vangin chawimawina semchhuah a ni lo hlauh a, Lewandoski a vanduai hle. Chuti ni lo se chawimawina ngaihhlut hlawh dawng kim tur a ni hial tawh.
Bayern Munich-ah ropui taka khelin, trophy lak theih zawng zawng lak kim hnuin chona thar hmachhawn a duh a, La Liga club lian FC Barcelona a zawm. 2022-23 season khan chona thar a hmachhawn chu tha zetin a chhang let a, Barca tan inelna hrang hrangah vawi 46 inlan in, goal 33 a thun bakah assist vawi riat a nei bawk. Barca hi La Liga-ah a champion pui nghal a, hei hian player tha a nihzia a nem nghet chiang hle.
4. Kevin De Bruyne
Manchester City leh Belgium midfielder pawimawh Kevin De Bruyne hi ball thiam chungchuang, playermaker tha ber ang hiala ngaih a ni. Ball a thiam a, a khawhhmuh a fiah a, ball pek a thiam a, a fing tel bawk nen striker chawmtu pawimawh leh tangkai tak a ni.
Playmaker tha ber ang hiala ngaih De Bruyne hi season liam ta khan Manchester City tan a vul hle. Inelna hrang hrangah City tan vawi 49 a khel a, goal 10 a thun bakah assist vawi 30 zet a nei tling hial bawk. City hian an dai ngai loh ram ropui an dai a, inelna ngaihhluthlawh pathum, Champions League, Premier League leh FA Cup-ahte an champion hial. Treble champion an nih theih nana thawhhlawk tak chu Kevin de Bruyne hi a ni.
Belgium captain De Bruyne hi mamawhna hmun pawh kawi theih player niin, khawiah pawh a rintlak hle zel. Striker anga chhawr a nih pawhin a rintlak hle zel a, muallai leh mual sira a awm pawhin goal thun theihna hun tha a siamchhuak thiam hle zel tho bawk. Heti khawpa tha a nih vang hian midfielder ropui ber pawla ngaih Zidane meuh pawhin, “De Bruyne hmuh phak ang hi ka hmu phak ve ngai lo”, a ti hial reng a ni.
3. Rodri
Manchester City leh Spain player pawimawh Rodri hi tunlaiah chuan holding midfielder tha ber ang hiala ngaih a ni. 2022-23 season-ah khan a par vul leh zual a, Manchester City in trophy lian pathum an lak theih nan leh UEFA Nations League-ah Spain an champion theih nan a thawhhlawk hle.
Langsar vut si lo, player nghet leh tangkai em em Rodri hian Champions League-ah City champion na goal a thun a. UCL final-ah hian ‘Man of the Match’ ah thlan a ni a. Nations League-a Spain an champion na kawng semi-final leh final-ah ‘Man of the Match’ a ni zawn leh zat bawk. Hei hian player tha leh thawhlawk a nihzia a tarlang chiang hle.
2. Erling Haaland
Premier League-a a season khatnaah goal a thun thei lutuk a, season khatah EPL goal thun tam ber record thar a siam nghal ringawt vangin Haaland hian EPL a ti ho zo nia ngaih a ni deuh hial. EPL hi striker tam takte hlawhchhamna, a hautak em vanga player tha tam tak zuih ralna a lo ni tawh thin a. Haaland erawh hi chuan a pal vel mai mai a, goal a thun zel mai thung. Haaland hian season liam ta khan City tan inelna hrang hrangah vawi 53 a khel a, goal 52 zet a thun. Season khatah EPL-a goal thun hnem ber record thar a siam bakah EPL-ah player of the year leh young player of the year chawimawina dawng kawp thei hmasa ber a ni nghal bawk.
English Premier League leh Champions League a top-scorer Haaland hian European Golden Shoe a dawng bawk. Mimal chawimawina ngaihhlut hlawh ber Ballon d’Or dawng tura zinkai zual pahnih zingah a tel mek. Ballon d’Or a dawng em lo a nih pawhin Europe-a chawimawina lian a dawng ngei a beiseiawm. Haaland hi a la naupang a, a lian a, thahruai a ngah a, ball a thiamin goal a thun thei bawk si a, player ropui tak ni zui thei tura ngaih a ni a. Kylian Mbappe nen Lionel Messi leh Cristiano Ronaldo te ang maiin ropuina an inchan chhawk theih a beiseiawm.
1. Kylian Mbappe
Kum 24 mi lek ni chungin World Cup final vawihnih a khel tawh a. World Cup top-scorer a nih tawh bakah World Cip-ah rawlthar tha berah thlan a lo ni tawh bawk. World Cup final 2022 ah hattrick hial a siamte kha player tha chungchuang a nihzia tilang chiangtu a ni. France tan ropui taka a inlan ang bawkin a khelhna club Paris Saint-Germain-ah Mbappe hi ropui takin a inlan bawk a, PSG tan goal thun hnem ber a ni leh der tawh.
Tharui nei tha, ball thiam, rilru huaisen leh goal thun thei Mbappe hian season liam ta khan PSG tan inelna hrang hrangah vawi 43 khelin goal 41 a thun a, assist vawi 10 a nei tling bawk. PSG tan goal a thun thei ang bawkin France tan goal a thun thei bawk a, season khatah France player zinga goal thun hnem ber record thar a siam tel bawk. Heti khawpa player ropui hian Ballon d’Or a la dawng rih lo a nih pawhin a hun a la herchhuak ngei tura ngaih a ni. October thlaa Ballon d’Or sem turah erawh World Cup-a Argentina champion puitu Lionel Messi leh Manchester City treble champion nihpuitu Erling Haaland te a nekchhuak zo rih dawn lo niin a lang.
Europe-a player tha bera ngaih Kylian Mbappe hian PSG a chhuahsan mai thei a, a chhuak a nih rual Real Madrid a zawm a rinawm. Real Madrid a zawm a nih chuan atan Ballon d’Or a hnai zual sauh tura ngaih a ni a. Real Madrid ni lovin EPL club ropui eng emaw ber a zawm thut mai thei bawk. Kum 24 leka upa Mbappe hi khawvela footballer hausa zual pasarih zingah a tel der tawh bawk.