Europe-ah tangseh a kir leh, kum 25 hnua vei an tam ber kum thleng

Europe-ah tangseh a kir leh, kum 25 hnua vei an tam ber kum thleng
Europe-a tangseh vei chu nikum khan a leta pungin kum 25 hnua an tam leh lai ber niin damdawi thuneituten an sawi.
World Health Organization (WHO) leh UN hnuaia Unicef tangkawpin report an siamah Europe leh Asia lailia naupang kum nga hnuai 40% chuangin tangseh hi an vei niin an tar lang.
“Tangseh a lo kir leh ta a, inkoh harhna hun a ni,” tiin WHO regional director for Europe Hans Henri Kluge chuan a sawi a. “Invenna pek a tam lo va, himna a awm lo,” a ti.
MMR vaccine hi tangseh leh biangboh venna niin he natna kai theihna 97% zet a veng thei.
Tangseh hi natna inkai awl tak, khuh leh hahchhiau khum atanga kai theih a ni a. A kaite chu an khawsik a sang a, an vun a bawl a, a sen a, an mittui a tla nasa a; an khuh a, an hahchhiau bawk thin a. Pneumonia, thluak khawih leh thihna hial a thlen thei.
WHO/Unicef-in Europe-a ram 53 dinhmun a enah kum 2024 chhung khan tangseh vei mi 1,27,350 an awm a, kum 1997 hnua an tam ber kum a ni.
March 6, 2025 thleng khan thihpui mi 38 an awm tawh bawk.
Tangseh hi kum 1997 atang khan a vei an tlahniam hret hret a; mahse, 2018-19 atang khan pung leh tanin 2023-24 phei kha chuan ‘Covid-19 len laia invenna pek loh nghawng’ a lang nia sawiin a vei an tam leh hle tawh.
“Ram thenkhatah chuan invenna pek hi hripui len hma ang kha a la ni phak lo va, a len chiam a hlauhawm hle a ni,” an ti.
Kum 2024 chhunga khawvel puma tangseh vei hmun thuma thena hmun khat chu Europe-a mi niin an sawi a. Europe-ah pawh Romania chu a vei tam ber niin mi 30,692-in an vei a, Kazakhstan-in dawtin mi 28,147-in an vei.
WHO/Unicef chuan tangseh hi ‘khawvel puma hlauhawm’ a la ni reng tih sawiin sorkarte pawh a vei an pun leh takah hian tan la thar turin an ngen a, a la thlen ve lohnaah pawh inring turin an ngen bawk.
Kum 2000-a ‘um bo tawh’ nia inngai, US-ah pawh tun hnaiah he hri avang hian mi pahnih an thi thar leh a, darh zelin Canada pawh a kai leh tawh.
Tun hnaia heti taka vei an pun leh chhan hi invenna pek a tlakhniam vangah an puh.
Europe-ah bik hian nikuma vei zinga 10 zela pariat chu invenna la lo niin European Centre for Disease Prevention & Control (ECDC) chuan a chhinchhiah.
Kum 2023 atang khan ram pali – Hungary, Malta, Portugal leh Slovakia te chiahin he hri a darh loh nana invenna pek tur 95% pe tling an ni tih ECDC chuan Thawhlehni khan a sawi.