Exam-a dik lova thil tih venna tur bill pharh

On Jul 28, 2026 9 0

Kar kal taa zirlaiten lungawi lohna an lantirnaa pellet gun hman chungchang sawi fiah tura eptuten Union Home Minister Amit Shah-a phuta an au buai chungin Thawhtanni khan sorkar chuan Lok Sabha rorel inkhawmah ‘The Public Examinations (Prevention of Unfair Means) Amendment Bill, 2026’ a pharh.
Rorelna in hniam zawk hi chawhma dar 11:00-a an tan hnu minute nga lekah tihtawp lailawk nghal ngaiin an awm a. Chhun dar 12:00-a an tan leh hnuah Union Minister Dr Jitendra Singh-a’n bill hi a pharh zui a. Sorkarin he dan thar siam tum hmanga a tum ber chu zawhna put ru awm thin tihtawpna tur leh a titute hremna na zawk pekna tur a ni.
May thlaa National Eligibility cum Entrance Test (NEET) zawhna kha a put nia sawi a nih avangin zirlai sang telin lungawi lohna an lo lantir tawh a ni.
Sorkarin zirlaite thil phut pawma Education Minister Dharmendra Pradhan-a a bân hnuah Inrinni zan khan zirlaite hian an lungawi loh lantirna an titawp tawh a, politic-a inbeih zuina erawh a la awm chhunzawm zel a. Eptute hian Singh-a’n bill a pharh lai pawhin an au bengchheng hle a ni.
Rorelna ina MP au bengchhengte hnenah Lok Sabha Speaker Om Birla chuan, “He thil hi sawiho in duhna a rei tawh a, vawiin hian kan sawiho dawn a. Parliament member zawng zawngte ngaithlaa he bill-a tihdanglam rawtna neite chuan chawhnu dar 1:00-ah insawi dawn nia,” a ti.
Birla hian hlawk tak leh awmze nei taka bill chu rorelna ina sawiho turin member-te a sawm nghal bawk.
“Political party hrang hranga member-ten hemi chungchang hi sawiho an phut nasa a. Inlungruala thawkho turin member-te ka ngen che u a ni,” a ti.
Speaker hian eptute chu rorelna ina kalphung pangngai an kal theihna tura awm tha turin a ngen a, “House-a rawtna in neih ang apiang chu sorkarin tih zel a tum dawn a. Chu chu mipui rorelna kalphung a ni a, mi tin thlirna leh ngaihdan ngaihthlak vek a ni ang,” a ti.
Cockroach Janta Party (CJP) kaihhruaia zirlaiten exam zawhna put duh lohna an lantir lai khan Prime Minister Narendra Modi-a chuan kalphung thar siam a ni dawn a, dan pawh duan a ni tih a lo sawi tawh a ni.