Inrinni zan khan FA Cup final khelh a ni a, Wembley Stadium a inkhel hmuhnawm takah Manchester United chuan 2-1 in Manchester City an hneh a, FA Cup-ah a vawi 13 nan an champion. FA Cup-ah an champion vangin United hian season tharh Europa League an khel ang.
FA Cup final-ah Manchester khaw club pahnih; Manchester United leh Manchester City te inkhel tur hian ngaihven a hlawh a. Manchester derby hi eng level-ah pawh an game a hmuhnawm lo ngai lova, chak zawk nih tumin thih tha tak meuh meuh an thawh thin. Final-ah hian champion lai leh EPL champion thar Manchester City chu champion tura rinkai zawk an ni a. EPL-ah pariatna ni chunga season hmang zo United hi hliamin a tihbuai nasat bawk vangin City lakah rin an kai lo viau.
Champion tura rinkai lo zawk United hi champion mamawh zawk an ni thung. FA Cup-ah hian an champion hlauh a nih chuan Chelsea nekchhuak in Europa League an khel phak dawn a. An champion a nih chuan manager Erik ten Hag-a’n ban a pumpelh mial mai thei bawk. Chak mamawh zawk an nih ang ngeiin chak tumin tan an khawh nasa hle a, an khel tha viau bawk.
Final hmuhnawm takah hian champion lai City an chesual a, goal an chhuah. Argentina rawlthar duhawm Alejandro Garnacho chuan hla tak atanga ball kal a um lut. Garnoacho hi hlauhawm siam thei lo tura dan beh theih ni bawk mah se City tlarhnung an chesual. Ball man tuma City si nghak Stefan Ortega a tlanchhuah laiin defender Josko Gvardiol chuan Ortega hi ball pek a lo tum ve thung. City tlarhnung tihsual hi hremin Garnacho hian awlsam zetin goal ruakah a pet goal a, minute 30-naah hmahruaina goal a thun.
Goal thun hmasa zawkah an tan vangin United an phur a, inrintawkna sang zawk nen an inlan chhunzawm a, goal pawh an thun belh leh thuai. City in na taka an nawr lak ata United hi fuh zetin an talchhuak. Mawi leh chiang taka City tlarhnung an k^t kual hnuin England rawlthar Kobbie Mainoo chuan minute 39-naah awlsam takin a pet goal a, an goal hnihna thunin, an hmahruaina a tizau. Mainoo goal thun hnu hian goal dang a luh belh thei lova, United in 2-0 a hmahruai chungin chawlhlawk an hmang.
Chawlhlawk hnu lamah City in an si phurh sut ngei tumin tan an khawh a, ball an chang tam a, United an nawr tawm hle. Ball chang tlem zawkah tang mah se United nawr let erawh a hlauhawm viau zel thung. Hun rei tak chhung goal lut a awm belh theih loh hnuin hun tawp dawn hnaih minute 87-naah fuh zetin a pet goal a, an si phurh a sut then. Doku goal thun hmangin City phur thar viau mah se goal dang an thun belh thei tawh lo va, 2-1 a chak Manchester United chu FA Cup champion an ni ta a ni.
FA Cup-ah an champion vangin Manchester United hian season tharah Europa League an khel dawn. FA Cup-a United champion hi Chelsea leh Newcastle in an tuar a. Europa League khel tur Chelsea in Europa Conference League an khelh a ngai dawn a. Europa Conference League khel tur Newcastle United in European competition an khelh loh phah dawn bawk.
FA Cup-ah champion mah se United manager Erik ten Hag hma lam hun tur a la chiang thei lo. An ban a nih pawhin hmun dangah kalin clug dang a champion pui leh mai tur thu Ten Hag hian a sawi.
FA Cup champion Manchester United
Get real time updates directly on you device, subscribe now.
Prev Post
Next Post