Kroos-a hun tawpah Real chakpui zo lo
-- Advertisement --
Inrinni Santiago Bernabeu inkhel kha Euro 2024 zawh ruala professional football chawlhsan tum ve tawh Toni Kroos-a tan Real Madrid home game a khelh tawpna tur a ni a, a hun hnuhnungah a team chakpui zo loin Real Betis nen goal awm loin an inhnehtawk.
Germany midfielder Kroos hian Real tan match 464 khel tlingin trophy pawh 22 a lakpui tling a; La Liga champion Real Madrid-in Spanish top flight title an dawn zan hian kan hma lawk Germany ram tournament lian khelh zawh ruala chawlh ve tum tawh Kroos chawimawina hun hman a ni a, inkhel tan hmain team pahnih player-te’n ‘guard of honour’ pein zahna leh thlahna hun an hmang a; second half minute 86-a khelmual a chhuahsan laiin Bernabeu mipuiin thawm ring tak nen an midfielder kalbo tur an thlahliam bawk.
Kroos hian Los Blancos thuam inbel chunga title 22 a lak tawh belhchhah turin hun tha dang a la nei a, kartawp Inrinni Champions League final-ah Carlo Ancelotti team hian Wembley khelmualah Borussia Dortmund an tum leh dawn a, an chak chuan Spanish giants hian European title 15 an hawn tling tawh dawn a ni.
Kum 34-a upa ni ve tawh Kroos hi Real hlawhtlingberte zinga pakhat niin, major trophy 20 chuang a lak tawh zingah European Cup ngawt pawh pali a tel.
An ramin European Championship a thlen zawh ruala football khela eizawn bansan a tum ve tak avangin kartawp Wembley match hi Real tana a game hnuhnungber a ni tawh dawn a, Inrinni Bernabeu inkhela a team-mate rualin a number eight jersey ha vek chunga a kalna tur kawng (corridor) an lo siam zawha khelmual a lut kha a insum zo lo teuh hle a, inpetruh teuh chungin a mittui far tur a dang hram hram!
Bernabeu khat veka pungkhawm fans lah chuan Kroos-a hmai chauh lanna flag lian mangkheng vai phe hlup hlup chungin an puanzarah chuan “Thank you, legend” tih an ziak nghe nghe.
Hun tawp dawna lakchhuah a nih laia ‘standing ovation’ dang a hlawhchhuah leh meuh chuan a mittui a dang zo ta ngang lo a, khelmual zira a fate pathum lo inhru mawlh mawlh nen an tap ho!
Inkhelh ban rualin coach leh a team-mate lamin hun rei tak Kroos hi an kuah a, boruakah an vawrkang bawk.
A hnua reporter-te’n an kawmnaah Kroos chuan, “Madridismo, club, ka team mate rual leh stadium hnena ka sawi theih awmchhun chu ka lawm e tih hi a ni.
“He kum 10 chhung hian ka inpui berah ka ngai a, engdang mah beisei ka neihbelh tawh lo. Kha kum 10 kha theihnghilh mi rual a ni tawh lo ang.
“Ka fate ka hmuh hma kha chuan ka la intichak hram hram thei a, a hnuah kha chuan ka insum zo ta lo a ni,” a ti.
Real Madrid khan point 95 hmu chungin La Liga campaign an zo a, an hnuai chiaha pahnihna luahtu an hmelma kumhlun Barcelona lakah point 13 zetin an sang a, Catalan team chuan an head coach chhawr lai Xavi Hernandez an petchhuak ta a ni.