Falkawn VC-in mitthi hminga land lease renew cancel phut

Falkawn VC-in mitthi hminga
land lease renew cancel phut
Falkawn Village Council chuan Falkawn rama Nursing Home dinna tura land lease pek chu ram hawhtu a boral tawh hnuah mitthi tawh hminga renew leh a ni tiin, hei hi rang taka cancel turin leh, mitthi tawh hminga renew a nih kawnga mawhphurtu zawng zawng dan anga hremna pe turin sawrkar an phut.
Thuchhuah an siamah, Falkawn VC chuan, kum 1983 khan Falkawn khaw chhung laili tlang pakhat area zau tak chu Aizawl pa Dr. CVL Auva hnenah Nursing Home siam nan pek niin ram pek a nih anga hman a nih loh chuan cancel leh nghal tura tih a ni, an ti a.
Ram pek a nih hnu leh State Sorkar Revenue Dept-in Land Lease No Misc 23 of 1989 a pek atanga ni 1.4.2019, kum 30 chhung leh vawiin thleng hian, Nursing Home dinna tur hawi zawngin Land Lease MISC 23 of 1989 chhungah hian hmalakna pakhatmah a awm lo, tiin thuchhuahah chuan tarlan a ni a.
Land Lease 23 of 1989 neitu Dr C. Vanlalauva hi 2015 kumah a boral a. Land Lease neitu a boral tawh hnu kum 4 zet, Land Lease hawh phalna hun chhung kum 30 ral hnuah, ram hawhtu hminga Renew leh hi Land Lease pek dan Terms & Conditions leh Dan hrang hrang bawhchhiatna a ni, an ti bawk.
“Land Lease No Misc 23 of 1989 Falkawn ram hi Pu J. Lalhmingliana, Kulikawn Aizawlin enkawlin Redwood Academy School a siam mek a. He Land Lease-a neitu boral tawh hnu leh hawh hun chhung kum 30 ral ruala renew copy bak hmuh tur awm loa Pu J.Lalhmingliana, Kulikawnin kut a thlak hi Falkawn VC chuan tha a ti lo a, sorkarah kan dodalna kan thlen a, Mizoram mipui hmuhah kan puang bawk a ni,” tiin thuchhuahah chuan an tarlang a ni.