Tuihna humhalh…

Tui pawimawhna inhrilhhriatna ni ‘World Water Day’ chu kan hmang liam leh ta. Zawm atana thu tha, dik leh pawimawh tak tak kan infah a, kan ngaithla a; hei hi kum 30 kalta atanga kum tina kan tih thin dan a ni. Hetianga tui pawimawhna leh tuihna humhalh pawimawhna kan inhrilh kum tin hi chuan tuihnate hi pung thur thurin tui hi hnianghnar taka neih theih awm tak ni si, engati nge tunah hian kan tuihnate hi a kang chhoh mêk a, tui harsatna a pun tak zel, tih zawhna hi han inzawt ta ila, a chhanna chu kan hre tlang vekin a rinawm. A chhanna hre kur si hian tui harsatna sutkian erawh kan tum lo a ni ang, tuihna pung si lovin a kang tual tual tlat si.
Tuihna insiamna hnar pui ber kan hria a, chu chu ramngaw a ni tih mithiamten an sawi a, a dik tih pawh a practical-in kan tawng mek.
Tunhma pi leh pute hun lai kha chuan ramngaw a la tam a, tlangkar kawrtê apiangah ‘kawrtê tui’ kan tih kha a awm thei. Khualzin leh ramhnuaia veivakte pawhin tui an pai ngai lo, kawrtê tui an ring mai. Tun laiah chuan ramhnuaia kal dawn chuan tui pai ngei ngei a ngai tawh.
Lei atanga tui lo puh chhuahna hi tuihna chu a ni a. Tui lo put chhuak chu kawrah a luang zel a, kawrtê dang atanga tui lo luangin a lo fin zel a, tui a lo tamin tui luanna kuang a lian tual tual a, a tawpah Lui a lo insiam ta a. Lui lianpui pui kan tihte hi tlemtê têa tuiput infawkkhawm a ni a, a tirah a rawn chik chhuak pur pur nghal lem lo.
Heng tui put, tuihna kan tihte hi thinghnah leh hnimin ruahtui a lo chelh khawmuan avanga lei chhungrila luang lut inkhawlkhawmte an ni a. Thing leh hnim awm lohna ram kawlhah chuan leilungin tui lo hip khawl hman lovin lei chunglangah chak takin ruahtui a luang liam puat puat a, lui a fin nghal a, a luang liam ta mai mai thin. Thlalerah tui a awm tam ve theih lohna chhan pawh ruahtui lo chelh khawmuangtu thing leh hnim a awm ve loh vang a ni.
Tuihna humhalh han tih hian, tuihna awmna lai hung kual a, thutchilh tlat lam a kawk lo va, kan lifestyle leh system siam rem atangin tuihna hi kan humhalh tan a ngai; thu chauh a tawk lo, a practical-a thawh chhuah a ngai a ni.