Falkawnah Zo nun zia enti

Falkawnah Zo nun zia entir
Chapchar Kut 2025 lawmna pualin Art & Culture department chuan hmanlai Mizo nunzia entirna, Falkawna Zo Khuaah an buatsaih a. Nilaini khan adviser to chief minister TBC Lalvenchhunga, MLA chuan a hawng. Adviser to CM chuan hnam anga thanglian a, hmasawnna tluantling nei tur chuan kan chawrchhuahna hnam ziarang humhalh leh chawisan hmasak a pawimawh tih a sawi a. Khawtlang nuam siam tur chuan Mizo nun zemawi, aia upa zahthiam, hawihhawm, rinawm leh tlawmngaih chu thangtharte nuna tuh a pawimawh tih a sawi.
Art & Culture department hmalaknaa Falkawnah ni hnih awh tur, Mizo nun ziarang pholanna buatsaih hian thangtharte nunah hnam ziarang humhalh duhna leh Mizo nun zemawi chawisan duhna thinlung puttirtu hmanraw tangkai tak ni turin a duhsak tih a sawi a ni.
Falkawna Zo khuaah hian lal in, khawnbawl in, zawlbuk, thir deng in, pum, mi naran in leh hmeithai in a awm a. Heng inah hian Mizo thuam leh hmanraw hrang hrang nen Mizo khawsak zia entir a ni. Naupang pawnto leh Mizo infiamna, Mizo la deh dan hrang hrangte entir a ni.
Hmanlai Mizo nun dan entirnaah hian Govt. Middle School Melriat, Falkawn MHIP, MUP leh YMA member-te an tel a. March 6 thlengin chawhma dar 10 atanga chawhnu dar 4 thleng man chawi loa tlawh theih a ni.