Fans lamin a chenna thlengin Leclerc bawhbuai

Fans lamin a chenna thlengin Leclerc bawhbuai
Ferrari driver Charles Leclerc chuan Monaco-a a chenna (apartment) kawtah lehzel chuan a fans pungkhawm lo hram se a duh thu sawichhuakin, vantlang hmun leh race track lamah chuan autograph sign leh fans thlalakpui a kalpui chhunzawm zel tur thu a sawi a, a chenna hmun lamah tal chuan chim-buai tawh lo se, a mimal zalen-na zahsak se a duh tih a sawi.
Kum 25 mi hian tunhnaiah a chenna ‘address’ chu vantlang hriatah a tlangthang tih sawi chungin a chenna kawtkaiah amah hmuh tum fans an punkhawm deuh reng thu leh door bell hmet tawk an awm reng thu a sawi a, in lamah lehzel chuan mipui chimbuai loa awm a thlakhlelh thu a auchhuahpui.
Ferrari driver Leclerc hi nikum khan Italy ramah scooter helmet khum mi pahnihin an selfie pui a, an kalbo rualin a sana bun lai an lo ruksak hman a; karliamta khan Italian police-te chuan nikum April thlaa Viareggio resort-a sana ruknaa inhnamhnawih mi pali an man thu an puang nghe nghe.
Fans lamin a mimal nun tla fal pawh awm hlei thei loa a chenna in lam thleng thlenga an bawhbuai zui zel hi harsatna lian a tlin rualin rawk duh tawk an lo awm zel a, hei vang hian Leclerc chuan Instagram lam-ah a privacy zahsak hram tura ngenna hial a tarchhuak ta a ni.
“Tunhnai thla tlemte liamtaah khan ka chenna hmun chu vantlang hriatah a darh ta tlat a, ka apartment hnuaiah awm tawk an awm reng a, ka door bell an hmet awl lo a, thlalakpui tur leh autograph sign turin min ngen tawk an awm reng.
“In tana remchan hi ka hlimna a ni reng fo a, min thlawpna pawh hmuin, ka lawm a, mahse, khawngaihtakin ka privacy ve hi chu min zahsak ula, kan in lamah lehzel chuan lo kal lo hram teh u.
“Kawtthlerah emaw tract lamah emaw min hmuh chuan mi zawng zawng tan ka ding ang a, kalsan che u ka tum lo ang, mahse, ka ina min hmuh tumte tan chuan ka lo chhuah a rem lo.
“Hmaichhan leh social media kaltlanga min thlawpna hi ka tan chuan engkima engkim a ni ngei mai a, mahse, min pelhsak loh tur boundary a awm tlat a ni,” a ti.
2023 Formula 1 season-ah Leclerc hian bul a tan tha lo a, intlansiak hmasa pathumah vawihnih ngawt a tlanchhuak zo lo a, driver standing lamah pawh 10-na a luah pha chauh.