Russian leh Belarusian player-te laka Swiatek ngaihdan

Russian leh Belarusian player-te laka Swiatek ngaihdan
Nawrna a nasat avang leh hremna na zawk tuar thei dinhmuna an din avangin nikum lama Ukraine runtu Russia leh an sangawizawnpui Belarus atanga tennis player-te inlan phalsak ve lotu Wimbledon chuan kuminah an thutlukna tidanglamin ram pahnih player-te chu neutral player ni chunga All England Club-a tel ve a phalsak ta a, he boruakah hian hmeichhe World No 1 Iga Swiatek a tawngchhuak a, tennis khawvel chuan Russia leh Belarus player tawh phawt chu tournament-a an tel ve khap pumhlum se a duh thu a auchhuahpui!
Ukraine thenawm ram leh Ukrainian-te thlawp tlattu ni bawk Poland ram chhuanvawr Swiatek hian tennis-in tihsual lian tak a neih thu tarlang telin, tournament atanga ram pahnih player-te hnawl chu Moscow hnena thuchah khawng tak thawnna hun remchang a nih thu leh chu hun tha chu tennis-in a bawhpelh nia a ngaih thu a sawi.
2022 Wimbledon tournament kha Indopui Pahnihna tawp hnua ram behchhan avanga tournament khelh phal loh kan hriat vawikhatna niin, World War Two hun lai khan grasscourt grand slam-ah hian German leh Japanese player-te chhuah ve an lo khap tawh bawk a ni.
Karliamta khan Poland nula Swiatek hian BBC hnenah a ngaihdan tlak taka sawiin, “World War Two avang khan German leh Japanese player-te bakah Italian player-te pawh Wimbledon-a tel ve phalsak an ni lo a, nikum lam boruak kan hre leh a, khatiang thil kha Russian sawrkar tana thuchah khawng tak ni turah ka ngai.
“Keini chu infiammi mai kan ni a, he khawvelah hian kan lian lo, sport zawk hi a pawimawh chu a ni a, kumkhaw tlai tluanin mipui hnena ngaihdan thehlarna leh sawimawina hmanrua atana hman a ni. Inrun chhuah tirh phat atang khan tennis pawhin mi zawng zawng hnenah player-te’n indona kan do tih hi a lantir thei.
“Vanduaithlaktakin, tennis hian chu kawng chu a zawh hauh lo a, tunah phei chuan Russian leh Belarusian player-te’n zalen taka tournament an khelh ve kan phalsak a, hei hi a fair lo ngawih ngawih a ni.
“Kan zavai mai hian Russian ramzauh tumna kal mek titawp turin tih theih kan nei vek a, federation hrang hrangin thutlukna an siamna kawngah kan penchhuak ve ngei tur a ni ang,” tiin Moscow-in an tisual tih an inhriat ngawih ngawihna tura eng infiamnaah pawh ram pahnih player-te danbeh kawnga tangrual turin khawvel a sawm!
Ram pahnih player-te hian harsatna nei loin tour-ah inelna an hmachhawn thei a, Grand Slam tournament paliah pawh kumin phei chuan neutral athlete ni chungin an inlan kim thei dawn!
Kumin Australian Open champion Belarusian Aryna Sabalenka khan tournament hmachhawn laia huatnain inthlakna pindan boruak a luah thin thu leh huatna an dawn thin pawm thiam thei tura beih hautakzia a sawichhuak tawh nghe nghe.
Tunhnai lawkah Ukraine sawrkar chuan World Cup qualifiers leh inelna dangah Russia nena intum a ngai dawn a nih chuan telh loh mai an thlan tur thu an puang a; tennis lamah ngei pawh inhuatna vawrtawp lantirna hmuh tur awm fo tawhin, Ukrainian player-te’n an tumpui Russian leh Belarusian player-te an chibai duh lo lai hmuh tur a awm fo.
Kum 21 mi Swiatek bawkin Russian leh Belarusian player-te tel vena tournament khelh laia locker room boruak tang ru tak thin chungchang sawichhuakin, “An passport kawlah hian an thiam loh a awm bik lo a, mahse, inthlakna pindan boruak hi a rit tlat zel.
“Hmaichhana intawn hi chuan Ukraine run dodalna sawichhuah kawngah pawh thil a danglam deuh hlek thei ang. “Chutih laiin, Daria Kasatkina-te ang chuan indo tan phat atang khan vantlang hriatah indona an duh loh thu an auchhuahpui mai a, indo hi zo thuai thuai se tih hi a duhthusam a ni.
“Tournament an khelh ve khapsak ni se ka duh thu sawichhuak mah ila, ram pahnih player-te pawh ka chibai mai a; Russian athlete-te tana indo duh loh thu auchhuahpui hi huaisenthlak tak nia ka ngaih avangin chutiang sawi ngamte chu ka zah takzet a, a chhan pawh an dinhmun hi a khirh ve em mai a, indo an dodal thu hi anni lamin ring taka an sawi a rem lo,” tiin an thlavang a hauh tel.