FBI-in China lab a\angin Covid-19 ti

FBI Director Christopher Wray chuan Covid-19 chu ‘Chinese sorkar thunun lab’ atanga chhuak ngei nia an ngaih thu a sawi.
“FBI te chuan ngun taka chhui chian a nih hnuah pandemic intanna chu lab atanga tihpalh thila putru ni ngeiin a ngai a ni,” tiin Fox News hnenah a hrilh a.
Tun hi FBI-in classified judgement an neih mipui hriata pandemic chungchang an sawichhuah hmasak ber a ni.
China chuan Wuhan lab atanga putru nia sawina chu hnawl thungin intihhmingchhiat tumna a ti a.
Wray-a thupuan hma lawk hian China-a US ambassador chuan China chu Covid origin chungchangah ‘thudik zawk sawi’ turin a lo ti tawh bawk a.
Wray chuan China chuan khawvel huap pandemic leng bultanna hriat a nih loh nan theih tawp chhuahin thup tumin chet a la tiin a sawi bawk a. “Chu tak chu vanduaithlak tak a nihna lai chu a ni,” tiin a sawi bawk.
Zirchianna thenkhatah chuan vrius chu ransa atangin mihringah Wuhan-ah inkaichhawn nia ngaih niin China seafood leh wildlife market te chu an tinzawn a ni.
Wuhan market hi China mai pawh ni lo khawvel huap pawha virus laboratory lar leh tha ber zinga ngaih Wuhan Institute of Virology te awmna atanga 40 minutes kal lek a ni bawk a.
USA government agency dangte pawhin pandemic chhui chianna nei thovin FBI te nena an thutlukna erawh a inang vek lo thug a.
A hma lawkin US media te chuan US energy department te chuan Covid chu lab atanga putru ni ngeiah an ngaih thu an lo sawi chhuak tawh a. Agency te chuan engtiang chiahin nge virus chu a intan chhoh dan erawh an chian theih loh thu an sawi thung.
Hetih lai hian White House National Security Council thupuangtu John Kirby chuan US President Joe Biden-an Covid chhuahna hriat nana sorkar hmalakna chu a thlawp tlat tiin a sawi a. US chuan tun thlengin chiang fakin a la hre thei lo, a ti bawk.
“Kan la hrefiah tawk thei lo,” tia sawiin, “American mipuite leh Congress te hrilh tur chiang fak kan hriat theih hunah chuan kan sawi mai ang,” tiin a sawi.
October 2021 khan US top spy official te chuan unclassified report tichhuakin chutah chuan US intelligence agencies pali te chuan Covid chu ransa emaw virus kaihhnawih atanga inkaichhawn nia an ngaih thu an sawi a ni.
Thla tam tak chhung chu pandemic len vanglaiin lab leak theory chu conspiracy theory anga ngaihna lianin hnawlin a awm a. Health officials te pawhin mipui nawlpui hriatah langsar tak takin coronavirus chu lab atanga siamchhuah nia sawi chu an hnawl thu an sawi hlawm.
World Health Organization (WHO) meuh pawhin lab leak theory chu a zirchian hnuah ‘thil awm ang lo’ tia sawiin mahse nasa taka sawisel a nih hnuah he agency director-general chuan zirchianna thar kalpui ni se ti thungin, “ngaihdan hrang hrang awm thei te kan pawm vek,” a ti zui thung.
Covid-19 hi kum 2019 tawp lama intan kha niin khawvel pumah mi maktaduai sarih chuangin nunna an chan phah tawh a ni.