Nigeria president thar tur Bola Tinubu

Ruling party candidate Bola Tinubu chu Nigeria president inthlan sawisel hlawh takah tlinga puan a ni.
Kum 70-a upa veteran politician hian vote 36% a hmu niin official result chuan a tarlang a.
A elpui ber Atiku Abubakar chuan 29% hmuin Labour candidate Peter Obi chuan 25% a hmu thung a. Opposition te chuan inthlan chu inbumnaa khat tia sawiin inthlan that an ngiat thu an sawi nghal a ni.
Tinubu hi Nigeria politician zingah pawh hausa ber te zinga mi niin a campaign auhla bera a hman pawh governor pawh a lo nih tawhna Lagos khawpui dinthar leh chu a ni.
Lagos khawpui governor thlannaah erawh Obi-an a lo hneh tawh a ni thung a, Obi hi politics lama la inhmang tam lo niin thalai lam a bik takin khawpuia cheng tena an duh em em a ni thung.
Tinubu hian a zikchhuahna south-west region lam ‘political godfather’ anga an ngaihna hmunah vote a hmu tha hle a. A campaign auhla ber pakhat pawh ‘Ka hun a ni tawh’ tih a ni.
President Muhammadu Buhari chu office term hnih a chelh hnuah chuhzui loh a thlang thung a, a hun laiin Nigeria economy in harsatna tawkin north-east lama Islamist insurgency avangin a ralmuang lo hle bawk a, ram pumah inrukbo te larin south-west lamah inlakhran tum te an che na hle bawk.
Tinubu chuan heng harsatna zawng zawng te hi a chinfel a ngai dawn a, Nigeria hi Africa-a a mipui tamna ber niin oil exporter lian ber a ni bawk.
Nigeria a military rule duh lova beitu zinga tel tawh niin Nigeria ram atanga bibo hial tawh leh kum 1999 a democracy dintu zinga tel pha ngat niin Tinubu-an president dinhmun a chelh thei hi thil mak vak nia ngaih a ni lo.
Buhari thlak tura langsar sa ber pakhat niin Buhari pawh kha a puihna vanga president ni theia ngaih a ni bawk a, mahse, a tum ang maia awlsam in thil a kal lo zawk tia sawi a ni.
Muslim a nia, running mate-ah Muslim bawk a thlang chu a tana harsatna siamtu tur tia sawi lawk erawh a thleng dik lo thung. Party lian tin te chuan presidential ticket an pekah Christian te an ngaihtuah tel thin a, Nigeria chhim lamah Christian an tam a, hmar lamah Muslim an tam thung a, Nigeria-ah hian mipui maktaduai 210 vel an awm a ni.
Tinubu hi Nigeria capital Lagos commercial hub-a siamtu langsara ngaih a ni bawk a. Chutih rualin economy derthawng tak a chhawm dawn thung a ni.