FCAA pawmna hnuhkir leh phutin total bandh nei dawn

FCAA pawmna hnuhkir leh
phutin total bandh nei dawn
ZPM sawrkarin Forest (Conservation) Amendment Act 2023 a pawmna hnuhkir leh phutin Mizo National Front party chuan vawiin – October 29 zing dar 6.00 atang hian Mizoram pumah total bandh an huaihawt dawn.
MNF Gen. Hqrs. thuchhuak chuan, FCAA 2023 dodalna total bandh neih a ngai ta chu pawi an tih thu a sawi a. He Act an pawmna hnukkir leh tura sawrkar an ngenna in awmzia a neih tak loh avangin, hnukkir leh tura ngenna a taka lantir theih hun buatsaih a lo ngai ta tih a sawi a ni.
‘Zoram pum forest neiloa min chhuahtu leh kan inhumhimna dan hlu ber, Article 371G engmah loa chantirtu FCAA hi kan hnawl ngam a ngai a. Hemi ngiat nana total bandh hi min thlawp a, hemi nia duty a fehchhuakte min zah sak vek turin mipui kan ngen a ni,’ a ti.
Bandh hi zing dar 6.00 atanga tan tur a ni a, tlai dar 4.00 thleng neih tuma ruahman lawk a ni. Bandh neih laia a tul anga kaltlang thei tur leh kaltlang theih dan puan lawk an ni.
FCAA a ngai ngaia pawm an duh loh thu aupuitu leh he dan duhlohna punkhawm huaihawt tawhtu Joint Civil Society of Mizoram (JCM) chuan October 29-a FCAA 2023 duhloh lantir leh hnuk let tura phutna atan MNF party-in total bandh an huaihawt tur chu an thlawp tih a sawi a. Mizo mipui zawng zawng, NGO hrang hrang leh political party zawng zawng pawhin thlawp turin an ngen tih a sawi.
‘FCAA 2023 hi kan ram leh hnam tan a tha lo takzet tih kan sawi nawn a. Tun maiah ni lo, nakin zelah kan ram leh hnam ralna kawng sialtu ah kan ngai. State Assembly-in FCAA 2023 a pawm tawh hi sut leh turin Mizoram sawrkar kan ngen nawn a ni,’ JCM thuchhuak chuan a ti.
PC party pawhin FCAA sut leh tura hmalakna apiang an thlawp tih sawiin, MNF party-in hma a lakna tur chu an thlawp a. Bandh hlawhtlinna atana mahni remchan anga che chhuak turin party mite an sawm tih an sawi a ni.