Fertilizer tawlhrukah CM a inrawlh ve nia sawi a ni – Robert Romawia

Fertilizer tawlhrukah CM
a inrawlh ve nia sawi a ni
– Robert Romawia
Fertilizer tawlhruk chungchangah chief minister a inrawlh nia sawi a nih thu MNF MLA Robert Romawia Royte chuan a sawi.
Thawhtannia Mizo Hnam Run inkhawmah MNF Thalai president ni bawk Robert Romawia chuan ZPM sawrkar hnuaiah dan bawhchhiatna a nasa a, kuhva tawlhruk a hluar a, fertilizer tawlhrukah pawh chief minister a inrawlh nia sawi a ni, tih a sawi. Dampa bial by election campaign-ah ZPM sawrkarin dan a bawhchhe nasa, tiin, dan bawhchhiat chu engah mah an ngai lo ni hiala a lan thu a sawi a ni.
Dampa mipui zingah ZPM hlawkpui an awm lo tih sawiin, ZPM sawrkarin engmah tak tak an ti thei lo tih hria se a duh tih a sawi. “Dampa bial mipui hian Dr R Lalthangliana, mithiam leh central lamah pawh a ngaihna hre tur, he bial harsatna tak tak lak atanga phurchhuak thei tur an thlan tlin a tul hle,” a ti.
Sawhthing leinaah vaibelchhe 4 chuang sum a chingpen thu hriat tur a awm tih MLA hian sawiin, “Chhui chiangin thil dik lo titu hrem thuai se kan duh hle,” a ti. Hmunphiahah pawh sawrkarin kuthnathawktute an tibeidawng hle tih a sawi a. Mamit district hmunphiah chingtuten sawrkar rate-in hmunphiah man an tel lo nasa niin a sawi bawk.
FCAA 2023 chungchangin thalai tam tak ram leh hnam hmangaihna kawngah a kaiharh tih MNF Thalai president hian a sawi a. Zoram thalaite chu ram leh hnam chhan turin lungrual taka hmalam pan a, do ngai do ila, thawh ngai thawhpuiah a sawm tih a sawi a ni.