Siaha district tana centre-in sum min pek min chhuhsak – Dr K Beichhua

Siaha district tana centre-in sum min pek min chhuhsak
– Dr K Beichhua
SASCI atanga sum hmuh, Siaha district tih hmasawnna tura sawrkar laipuiin cheng vaibelchhe 75 a dah sak chu state sawrkarin a chhuhsak a, Union Finance minister-in ziaka a thlensak pawh an ngaipawimawh duh lo tih Siaha bialtu MLA Dr K Beichhua chuan a sawi.
Thawhtannia an party office-a inkhawmah BJP Mizoram president ni bawk Dr K Beichhua chuan, ‘Special Assistance to States for Capital Investment’ sum atanga Siaha tana hmasawnna hna thawhna tur, state sawrkar sum hmuh vaibelchhe 328 atang Siaha district tana sum pek tur, Union Finance minister-in a pawmsak tawh vbch. 75, state sawrkar hnenah ziaka a thlensak pawh ngaipawimawh duh loin ZPM sawrkarin a chhuhsak vek tih sawiin, “Union minister thu meuh an zawm duh lo hi enge a chhan tih ka zawt a ni,” a ti.
Central lam hian state sawrkar hmalak dan hi an hriat bakah an ni pawhin state sawrkar hmalak duh dan hi central hotute hnenah ziak leh phone hmangin an thlen dawn tih State BJP hruaitu hian a sawi a. “State sawrkarin hetiang rilru a put takah chuan Mizoram tana thil tha duh leh Mizoram hmangaihtu tan chuan kalphung thar kal dan hi kan hrethiam tawh loa, engkim mai hi kan politicise dawn a nih chuan kan hmabak hi a eng vak bikin ka ring lo,” a ti.
ZPM-in an sawrkar hunah ‘restricted tender’ an ti ve dawn lo tia an intiamna chu dawt a nih zia a langchiang ta, tiin, sawi loh anga awm thin sawrkar kan hrawn mek tih a sawi.
Dampa bial by election neih turah tunkar chhung hian bial tana an tih tur hrilhhriatna hun Union minister George Kurian hoin an nei leh dawn tih Dr K Beichhuah hian a sawi a. Union minister Kiren Rijiju leh Dr Jitendra Singh te meuhin an mamawh link road, Reiek to Lengpui inkalpawhna tur khaw hrang hrangin an hnena an thlen chu Pu Lalhmingthanga an vote tlin hnuah anmahni ngeiin a tih hlawhtlinnan an rawn kal leh tur thu an sawi chu, Dampa bial mipui hnenah an hrilh nawn leh tih a sawi a ni.