FIFA in Messi leh Argentina an duhsak em ni?

World Cup a intum turte engtiang a siam rem nge an ni a, dikhlel leh induhsakna te a awm thei em tih chungchangah zawhna a awm thin a. World Cup 2026 ah ram 48 te group 12-a then darh an nih dan leh fixtur siam dan kalphung kan tarlang ang. A hmasain World Cup 2026-ah ram 48 an lo awm a, ram 48 te hi group 12-ah ram pali zelin then darh an ni tih hre hmasa ila.
1. Pot an siam.
Fifa ranking a an san dan indawtin plot-ah then an ni a. Fifa ranking a sang zualte pakua leh a thlengtu ram pathumte pot 1-ah an an awm phawt a. Fifa ranking atanga chhutin plot li-ah then darh vek an ni. World Cup 2026-ah hian Group A-ah Plot khata awmte hi intum tur ni lovin, Group Stage-a intum lo tur tihna zawk a ni.
Group A-a awm turin Plot 1 atangin pakhat, Plot 2 atangin pakhat, Pot 3 atangin pakhat leh Plot 4 atangin pakhat zel an pawt chhuak a, ram pali an lo awm tlang ta a ni. Chutiang zel chuan Group A atanga Group L thlenga awm tur an pawt pek a, group 12-ah ram 48 te an lo insem darh ta a ni.
Khawmualpui hrang hrang paruk atangin World Cup khel thei tur zat bituk a awm a: Asia (AFC) -9, Africa (CAF) – 10, South America (CONMEBOL) – 6, North America (CONCACAF) – 6, OFC – 1, Europe (UEFA) – 16 te a ni a. Khawmual khata awmte hi Group Stage-ah bik intum thei lo tura dah hran phawt an ni a. Group 12 a awm laiin Europe atanga khel thei 16 lai an awm vangin Europe ram thenkhatte chu group pali-ah loh theih lova an awm tlan a ngai thung,
2. Competative Balance : World Cup fixture siam laia Fifa rankinga sang zual palite final hmaa an intum loh nan ruahmana siam a ni a, chu chu Competative balance tih a ni.
World Cup 2026 fixture siam lai hian Spain leh Argentina chu Fifa ranking a No. 1 & 2 an ni a. Anni pahnih hi group champion an nih chuan final hmain an intum thei lo phawt a. No 3 & 4 – France leh England pawh dah hran niin Group champion an nih chuan final hmain an intum thei lo bawk. Group champion an nih chuan tih a ni a, Group champion an nih loh erawh chuan final hmain intum theihna chance sang tak an nei tho thung.
Group J-ah Argentina an lo champion ta a, Group H ah Spain champion zo lo ta se, pahnihna an nih vangin last 32-ah Argentina nen an intum nghal a ngai dawn. Chutiang bawk chuan Group K-ah England lo champion zo lo ta sela France nen semi-final-ah an intum thei dawn tihna a ni bawk. Chutiang zel chu a ni a, seeded pawhin beisei an phak a, group champion an lo nih ve a ngai.
Seeded pali te hi group champion an nih tak vek vangin Argentina leh Spain chu final hmain an intum thei dawn lova, France leh England pawh final hmain an intum thei dawn lo bawk.
Induhsakna a awm thei em?
Ranking a sangte hi chuan eng inelnaah pawh hamthatna chu an nei thin. Tennis inelna lian Grand Slam-ah pawh World No. 1 kawng chu a awlsam bik a, No. 2 nen final hmain an intum thei lova, World No. 3 pawh final hmain a tum thei ngai lo bawk. World Cup fixture pawh hi Fifa ranking atanga teha siam a ni a, dan pela dikhlel leh induhsakna a awm tak tak thei lo.
World Cup 2026 khelh mekah pawh hian ‘FIFA in Argentina a duhsak a, an kawng a awlsam bik. Portugal an duh sak lova, an kawng a harsa’ tia sawite a awm thin. Argentina hi Group J ah champion zo lo se last 32-ah Spain an hmchhawn nghal ang a, France, Germany, Portugal, Netherlands leh Morocco te nen pool khatah an awm dawn. Group champion an ni a, an kawng tlemin a ziaawm.
Chutihlai chuan Portugal hi Group K champion ni se chuan Last 32-ah Ghana an tum ang a, last 16-ah Switzerland leh Austria te inkhela chak zawk zawk hmachawn zui lehin, quarter-final-ah Argentina nen an insu thei dawn. Portugal leh Argentina inkhel chu khawvel hmuh chak a lawm. Mah se, Group K-ah Portugal an champion zawh loh vangin final hma chuan Argentina leh Protugal an intum thei dawn ta lo. Chuan, Group champion an nih loh vangin Portugal kawng a har ta sawt bawk.