Season khat chhunga player tha zual 11 thlanna FIFPRO Men’s XI-ah champions league champion Real Madrid an langsar viau a, player paruk ngawt an thawh. FIFPRO Men’s XI hi Real Madrid leh Manchester City player deuh deuh vek an ni a, Liverpool defender Virgil van Dijk chu Real Madrid leh City player ni lo awmchhun a ni.
FIFPRO Men’s XI 2024 ah hian si nghak atangin Manchester City si nghak Ederon thlan a ni a. Tlarhnungah Real Madrid defender pahnih Dani Carvajal leh Antonio Rudiger bakah Liverpool centre-back Virgil van Dijk te thlan an ni.
Muallaiah Real Madrid leh Manchester City in player pahnih ve ve an thawh. City atangin midfielder General an tih mai Rodri a lan bakah Kevin de Bruyne a lang bawk. Real Madrid atangin Jude Bellingham leh football chawlhsan tawh Toni Kroos te thlanchhuah an ni ve bawk. Hetihlai hian tlarhmaah Manchester City striker Erling Haaland bakah Real Madrid player pawimawh Vinicius Jr bakah PSG chhuahsan a Real Madrid player ni ta Kylian Mbappe te thlan an ni.
Mipa leh hmeichhe lamah FIFPRO XI thlangchhuak turin professional footballer 28,000 chuang zetin vote an thlak thin a. Postition tiina vote hmu sang zual 11 te tarchhuah an ni ta thin a ni.
FIFPRO Men’s XI nena inhmeh tawh tak Argentina superstar Lionel Messi chuan kum 2006 hnu lamah a vawi khat nan FIFPRO Men’s XI-ah hmun a chang phak ve ta lo thung.
FIFPRO Men’s XI ah Real Madrid an langsar
Get real time updates directly on you device, subscribe now.
Prev Post