Filipina Eala a la dam!
All England Club-a lasi thawnthu ang maia thlawk mek Philippines nula Alexandra Eala chuan Inrinni zan khan history thar siam belh lehin third round match pakhatah defending champion Iga Swiatek hnehin an ram atanga Wimbledon last 16 thleng hmasaber a ni.
Centre Court ngei maiah Filipina star hian 7‑6(9), 6-2-a Polish third seed hnehin All England Lawn Tennis and Croquet Club-a 2026 Wimbledon Championships women’s singles round lina a thleng a, zanin quarter-final luh inchuh match pakhatah 2024 Wimbledon runner-up Jasmine Paolini a hmachhawn zui leh ang.
Nikum Miami Open-ah pawh Eala lakah Swiatek hi lo tlawm tawhin, kumin Madrid clay-a an intawn nawn leh Pole hian Filipina lakah phuba a la a, All England Club-ah Swiatek a tlawm zui leh ta a ni.
Rybakina barakhaihtu Mertens
Wimbledon third round inkhel pakhatah Inrinni zan khanKazakhstan star Elena Rybakina chu rin kai lo zawk Belgium nula Elise Mertens lakah 7-6(4) 6-1-in a tlawm ringawt a, world number one ranking a beisei mekna pawh a zuihral.
Reigning Wimbledon doubles champion Mertens hian last 16 match pakhatah Czech Marie Bouzkova a tum leh ang.
Kazakh second seed Rybakina tan Aryna Sabalenka kut atanga world number one nihna chhuhsak turin quarter-final luh a tawk a, mahse, 25th seed Mertens a ngam zo ta lo a, kumin Australian Open title leh 2022 Wimbledon lallukhum a lo sualchhuah ve tawh belhchhaha major title dang a beiseina a thlawn leh ta rih.
Belgian kum 30 mi Mertens tan tun kha Wimbledon last 16 stage tum li a thlenna a ni ve ta Rybakina nen vawi kua an intawn tawha a vawi hnih chakna chiah a ni.
Nizan women’s singles round of 16 inkhel result tarlan hman lohah top seed Aryna Sabalenka leh Japanese 14th seed Naomi Osaka intumin, 4th seed Jessica Pegula (United States) leh a chipui 16th seed Iva Jovic an insu bawk.
Quarter-final luh inchuh match khel dangte chu 11th seed Belinda Bencic (Switzerland) vs 7th seed Coco Gauff (United States) leh 10th seed Karolina Muchova (Czech Republic) vs Barbora Krejcikova (Czech Republic)-te an ni.