Filipino Eala kal thui leh tawh mah mah!!

Kum 21 leka upa Alexandra Eala Wimbledon third round lut zet chuan Philippines ramah tennis a vultir chiang ngang mai a, Filipino world boxing champion Manny Pacquiao avanga he rama boxing a alh ang em kha chu a la tluk pha lo deuh a nih pawhin vawiina a tum leh tur chuan infiamna lama he rama Pacquiao boruak han el pha teuh ber a ni tawh hial mai thei!
Philippines hi boxing leh basketball uar ram ni mah se Ningani women’s singles round of 64 inkhel pakhata 29th seed Eala hnehna chang khan Filipino fans a chawkphur chiang hle a ni.
Australian nula Maya Joint lakah Alexandra Eala hian set khatna hloh zet mah se set hnuhnung pahnih a thunun nghet hmiah a, 3-6, 6-2, 6-0 hnehna nena All England Club round thumna a chuangkai meuh chu Pacquiao pawh a ngawi mai mai thei lo a, a chipuinu chu a chhuan thu leh kal zel tura a duh thu a sawi.
Wimbledon doubles lama a kawppui hlui Venus Williams pawhin history thar siam Filipino lawmpuina thu a thawn.
Philippines tuiliak zinga Grand Slam tournament-a thleng sang ber ni mek Eala hian Spain rama Rafael Nadal-a din tennis academy hmingthang takah training a kalpui thin a, a idol Nadal vanga pan hlawh he zirna hmunpui hian eng tiatah chiah nge a vawrh chhuah dawn kan thlir chhunzawm zel ang.
Kum 2022 khan an ram atanga junior Grand Slam title la thei hmasaber ni turin US Open trophy a hawn tawh a, Vogue chanchinbu kawmah hial a lan phah a.
Hming a chher zualna zawk mah chu nikum Miami Open quarter-final match pakhata world number one hlui Swiatek ngei mai a hneh nawlh kha niin, zanin pawh hian a chipuite chuan Pole laka hnehna chang nawn leh turin an beisei sang khawp ang le!
A tennis career chimchin sang zel hian Philippines ramah tennis game pawh a chawisangin, a larpui ve zel a; kumin January thla pawh khan an fanu rangkachak inkhel lai tawiawm turin Filipino fans sang chuang chu Melbourne Park-ah an tleh thla tawh a; kha mi thla vek khan WTA event pakhat Philippine Open an tih pawh a tum khatna atan an ramah khelh a ni ve ta hial a ni.
Fifa World Cup khelh lai mah ni se he khawchhak nula hian Wimbledon lamah Filipino fans a liampui nasa leh tawh khawp mai a, Australian laka a hnehna chang lai pawh kha red, yellow and blue national flag vai sup sup chunga tawiawmtu an thahnem leh hle!