Finfiah pawimawh

Tunlai hian rel kawng siamna tur thir bungrua hmun hrang hranga chhawpte chu thirchhe zawngten an ru nasa a, Ispat-in an lo leisak thin niin social media lamah tarlan a ni a. Hei hi a rang lama finfiah a, a tul anga hmalak zui a pawimawh dawn hle a; hei hi thuneituten an bawhzui vat a ngai niin a lang.
Tuna rel kawng sial hna thawh mek hi Mizoram tana hmasawnna peng pawimawh tak pakhat tur a nih avangin hna thawh a nih dan hi uluk leh ngunthluk taka a ram leilung fate hian kan lo enpui ve a pawimawh hle a. Tuna social media lama thuthang hi a lo dik tak tak a nih phei chuan, hnathawh endik pui mai piah lamah a vena venpui pawh a ngai hial dawn tihna a ni awm e. Hetiang thil hi a thleng a nih chuan, state hmingchhiatna nasa tak tur a ni dawn a; mahni state chhung develop-na tur bungrua lo rubo thin state nih chu thil zahthlak tak a ni ang.
Hetih rual hian, rukruk thil lo leitu pawh a rutu ang thova thubuai awrh thei a nih avangin, thirchhia lo leitute chungah pawh action lak a pawimawh dawn a. Mizoramah ruihhlo a hluarna chhan chu ruihhlo ti duh an tam vang a ni a; chutiang bawkin rukruk a hluar chhan pawh a lo leisaktu an awm thin vang a ni mai a. Thirchhia hmanga sumdawng lian tak Ispat hian rel kawng siamna bungrua chu an hai hauh lo ang a, ruk a ni tih hre reng chunga an lo leisak duh a nih chuan rukru ang bawka thil sual titu an ni ve nghal tihna a ni a, chutiang ti thinte chungthu rel a nih dan pawh hriatsa vek a ni.
Tunhma deuh khan electric ban lian (Tower) part a bo thin a, vanneihthlak takin a tlukchhiat hmaa hmuhchhuah a ni thin hlauh a, chhiatna nasa a thlen hmain siam that leh thin a ni. Electric hrui pawh tunhma khan a bo thin bawk. Khangte pawh kha a lei duhtu an lo awm thin vang a ni ber ang chu. Thawkkhat lai khan Mizoram hmun hrang hranga bailey bridge chim thawm hriat tur a awm zut mai a, a parts rukbo vanga puh thawm te pawh hriattur a awm kha. Thirchhe zawnga sumdawngte pawh hi a khat mawi tawka enfiah zauh zauh a pawimawh dawn hle a, chu chuan awmzia thui tak a neih a rinawm.
Lei parts pawh rubo duh an awm a nih chuan, relkawng sial zawh a nih hnuah pawh security thila hmalak zui dan turah relkawng sialtute hi finchhuah nachang kan hriat a pawimawh dawn niin a lang.